వాట్సప్‌ ఛాట్‌ ఫిల్టర్‌

వాట్సప్‌ గత కొన్నిరోజులుగా గోప్యతను కాపాడుతూనే ఎన్నో వినూత్న ఫీచర్లు పరిచయం చేస్తోంది. ఎక్కువ మందికి మెటా ఏఐని అందుబాటులోకి తేవటం దగ్గరి నుంచి యాప్‌ నుంచే బస్‌ టికెట్లు కొనుక్కోవటానికి వీలు కల్పించటం వరకూ ఎన్నో సదుపాయాలను ఆరంభించింది. తాజాగా మెసేజ్‌లను తేలికగా వర్గీకరించుకోవటానికీ ఛాట్‌ ఫిల్టర్స్‌ ఫీచర్‌ను తీసుకొచ్చింది. దీంతో ఇన్‌బాక్స్‌లో కింది వరకూ స్క్రోల్‌ చేయాల్సిన అవసరం లేకుండా అవసరమైన ఛాట్‌ను తేలికగా కనుక్కోవచ్చు. చాట్స్‌ క్రమబద్ధంగా వర్గీకరించుకోవటానికి, ముఖ్యమైన ఛాట్స్‌ను గుర్తించటానికి, ఆయా మెసేజ్‌లను తేలికగా చూసుకోవటానికిది ఉపయోగపడుతుంది. ఛాట్‌ ఫిల్టర్స్‌లో భాగంగా ఆల్‌, అన్‌రీడ్‌, గ్రూప్స్‌ అనే మూడు విభాగాలుంటాయి. ఆల్‌ ఫిల్టరేమో డిఫాల్ట్‌గా అన్ని ఛాట్స్‌ను చూపిస్తుంది. అన్‌రీడ్‌లోనైతే జవాబులు ఇవ్వని లేదా అన్‌రీడ్‌గా మార్కు చేసుకున్న ఛాట్స్‌ ఉంటాయి. గ్రూప్స్‌ ఫిల్టర్‌లో అన్ని గ్రూప్‌ ఛాట్స్‌ కనిపిస్తాయి. ఈ ఫీచర్‌ ప్రస్తుతం కొందరికి అందుబాటులోకి వచ్చింది. తర్వలో ఎక్కువ మందికి విస్తరించనున్నారు.