AstraZeneca: గిరాకీ తగ్గింది.. టీకాను మార్కెట్‌ నుంచి వెనక్కు తీసుకుంటున్నాం: ఆస్ట్రాజెనెకా

దిల్లీ: తాము ఉత్పత్తి చేసిన కొవిడ్‌-19 వ్యాక్సిన్లను మార్కెట్‌ నుంచి వెనక్కు తీసుకుంటున్నట్టు ఆస్ట్రాజెనెకా (AstraZeneca) ప్రకటించింది. మార్కెట్‌లో అప్‌డేటెడ్‌ టీకాలు పెద్ద సంఖ్యలో అందుబాటులోకి వచ్చిన నేపథ్యంలోనే ఈ నిర్ణయం తీసుకున్నట్లు తెలిపింది. తమ వ్యాక్సిన్‌ వ్యాక్స్‌జెవ్రియాకు గిరాకీ తగ్గిందని పేర్కొంది. ఇప్పటికే దీని తయారీ, పంపిణీని నిలిపివేసినట్లు వెల్లడించింది.

ఆక్స్‌ఫర్డ్‌ విశ్వవిద్యాలయంతో కలిసి ఆస్ట్రాజెనెకా కొవిడ్‌ వ్యాక్సిన్‌ను (Covid Vaccine) అభివృద్ధి చేసిన విషయం తెలిసిందే. ప్రస్తుతం ఈ టీకాపై న్యాయస్థానాల్లో విచారణ జరుగుతోంది. దీని వల్ల దుష్ర్పభావాలు తలెత్తినట్లు పలువురు కోర్టును ఆశ్రయించారు. దీనిపై వివరణ ఇచ్చిన ఆస్ట్రాజెనెకా తమ వ్యాక్సిన్‌ వల్ల చాలా అరుదుగా సైడ్‌ ఎఫెక్ట్స్‌ ఉండొచ్చని తెలిపింది. ఈ తరుణంలో వెనక్కు తీసుకుంటున్నట్టు ప్రకటించడం ప్రాధాన్యం సంతరించుకుంది.