Depression: కుంగుబాటు మందులతో ‘ఆహ్లాదం’ ఆవిరి!

లండన్‌: కుంగుబాటు చికిత్స కోసం వాడే యాంటీడిప్రెసెంట్ల వల్ల రోగుల్లో భావోద్వేగపరమైన స్తబ్దత నెలకొనవచ్చని బ్రిటన్‌ శాస్త్రవేత్తలు పేర్కొన్నారు. పరిసరాల నుంచి నేర్చుకునేందుకు వీలు కల్పించే ‘రీఇన్‌ఫోర్స్‌మెంట్‌ లెర్నింగ్‌’ అనే ముఖ్యమైన ప్రక్రియపై ఈ మందులు ప్రభావం చూపుతాయని వెల్లడైంది. కేంబ్రిడ్జ్‌ విశ్వవిద్యాలయ శాస్త్రవేత్తలు ఈ పరిశోధన చేశారు.

దీర్ఘకాల లేదా తీవ్రస్థాయి కుంగుబాటు సమస్యకు సెలెక్టివ్‌ సెరోటోనిన్‌ రీఅప్‌టేక్‌ ఇన్‌హిబిటర్లు (ఎస్‌ఎస్‌ఆర్‌ఐ) అనే ఒక తరగతి ఔషధాలను ఉపయోగిస్తుంటారు. ఈ మందులు.. మెదడులోని నాడీ కణాల మధ్య సంకేతాలను మోసుకెళ్లే సెరోటోనిన్‌ అనే ఒక రసాయనాన్ని లక్ష్యంగా చేసుకుంటాయి. దీన్ని ‘ఆహ్లాద రసాయనం’ అని కూడా పిలుస్తుంటారు. ఈ మందుల ప్రభావం వల్ల రోగుల్లో గతంలో ఉన్నంత ఆహ్లాద భావనలు కనిపించవని శాస్త్రవేత్తలు వివరించారు. 40-60 శాతం మందిలో ఈ దుష్ప్రభావం ఉంటోందని తెలిపారు. ‘‘ఈ మందులు ఎలా పనిచేస్తాయన్నది ఈ పరిశోధన స్పష్టంచేస్తోంది. కుంగుబాటు ఉన్నవారిలో కొంతమేర భావోద్వేగపరమైన బాధను ఇవి నిర్మూలిస్తున్నాయి. దురదృష్టవశాత్తు కొంత సంతోషాన్ని కూడా అవి హరిస్తున్నాయి’’ అని పరిశోధనకు నాయకత్వం వహించిన బార్బరా సాహాకియాన్‌ వివరించారు. కొందరు వాలంటీర్లపై 21 రోజుల పాటు ఈ అధ్యయనం జరిపి ఈ మేరకు తేల్చారు.