అమెరికాలో పోలీసుల కాల్పులు.. భారత సంతతి వ్యక్తి మృతి

న్యూయార్క్‌: అమెరికాలోని శాన్‌ ఆంటోనియోలో జరిగిన పోలీసు కాల్పుల్లో భారత సంతతి వ్యక్తి సచిన్‌ సాహు (42) ప్రాణాలు కోల్పోయారు. అరెస్టు సమయంలో సాహు తమను అడ్డుకొనేందుకు ప్రయత్నించారని పోలీసులు తెలిపారు. ఈ నెల 21న ఈ సంఘటన జరిగింది. ఓ మహిళపై దాడి జరిగిందన్న ఫిర్యాదుతో పోలీసులు సాహు ఉంటున్న ప్రాంతానికి చేరుకున్నారు. ఓ 51 ఏళ్ల మహిళను సాహు ఉద్దేశపూర్వకంగా వాహనంతో ఢీకొని పారిపోయినట్లు తెలుసుకున్నారు. బాధితురాలిని ఆస్పత్రికి తరలించారు. కొన్ని గంటల అనంతరం ఘటనా స్థలానికి నిందితుడు చేరుకున్నారన్న సమాచారంతో పోలీసులు రంగంలోకి దిగారు. ఆ సమయంలో తన బీఎండబ్ల్యూ ఎస్‌యూవీ వాహనంతో సాహు పోలీసులను ఢీకొట్టే ప్రయత్నం చేశారు. ఈ క్రమంలో ఓ పోలీసు అధికారికి గాయాలయ్యాయి. మరో అధికారి కాల్పులు జరిపారు. దీంతో సంఘటనా స్థలంలోనే ఉత్తర్‌ప్రదేశ్‌కు చెందిన సాహు ప్రాణాలు కోల్పోయారు. బైపోలార్‌ డిజార్డర్‌తో సాహు బాధపడుతున్నట్లు ఆయన మాజీ భార్య గోల్డ్‌స్టీన్‌ తెలిపారు.