మూగబోయిన 320 ఏళ్ల వార్తాపత్రిక!

‘వీనర్‌ జైటుంగ్‌’ రోజువారీ ముద్రణ నిలిపివేస్తున్నట్లు ప్రకటన

బెర్లిన్‌: ప్రపంచంలోని అత్యంత పురాతన వార్తాపత్రికల్లో ఒకటైన ‘వీనర్‌ జైటుంగ్‌’ గొంతు మూగబోయింది! దాని రోజువారీ ముద్రణను నిలిపివేస్తున్నట్లు అధికారిక ప్రకటన వెలువడింది. మూడు శతాబ్దాలకుపైగా చరిత్రకు సాక్ష్యంగా నిలిచిన ఈ పత్రిక చివరి సంచికను శుక్రవారం ముద్రించారు. ‘వీనర్‌ డయేరియం’ పేరుతో 1703 ఆగస్టు 8న ఈ పత్రిక ప్రారంభమైంది. తర్వాత దాని పేరు ‘వీనర్‌ జైటుంగ్‌’గా మారింది. ఆస్ట్రియా ప్రభుత్వమే దీనికి యాజమాన్యంగా ఉన్నా.. ఎడిటోరియల్‌ పరంగా స్వతంత్రంగానే కొనసాగింది. ప్రింట్‌ మీడియాకు సంబంధించిన ఓ చట్టంలో ఇటీవల మార్పులు చోటుచేసుకోవడం.. వియన్నా కేంద్రంగా నడిచిన ఈ పత్రికకు శరాఘాతంగా మారింది. దాని ఆదాయం గణనీయంగా పడిపోయింది. ఫలితంగా ముద్రణను నిలిపివేశారు. ‘320 ఏళ్లలో 12 మంది అధ్యక్షులు, 10 మంది చక్రవర్తులు, 2 దేశాలు, ఒకే పత్రిక’ అంటూ చివరిరోజు ఎడిషన్‌ మొదటి పేజీలో వీనర్‌ జైటుంగ్‌ ప్రచురించింది. రోజువారీ ప్రింటింగ్‌ను నిలిపివేస్తున్నప్పటికీ- ఆన్‌లైన్‌ ఎడిషన్‌ కొనసాగుతుందని యాజమాన్యం వెల్లడించింది. మాసపత్రిక రూపంలో అందుబాటులో ఉండేందుకూ ప్రణాళికలు రచిస్తున్నట్లు తెలిపింది.