మా దేశం విడిచి వెళ్లిపోండి

17 లక్షల మంది అఫ్గాన్‌ వాసులకు పాకిస్థాన్‌ హుకుం

ఇంటర్నెట్‌ డెస్క్‌: అఫ్గానిస్థాన్‌ నుంచి శరణు కోరి వచ్చే వారిపై పాకిస్థాన్‌ కఠిన వైఖరి అవలంబిస్తోంది. అనుమతి లేకుండా వచ్చినవారు వెంటనే తమ దేశం విడిచి వెళ్లిపోవాలని ఆదేశించింది. లేదంటే తరిమేస్తామని హెచ్చరించింది. ఇలా అఫ్గాన్‌ నుంచి శరణార్థులుగా వచ్చినవారు దాదాపు 17లక్షల మందికి పైగా ఉన్నట్లు సమాచారం. వీరందరినీ దేశం నుంచి పంపించేందుకు పాకిస్థాన్‌ ప్రయత్నాలు మొదలుపెట్టింది. అఫ్గాన్‌ 2021లో తాలిబన్ల చేతిలోకి వెళ్లాక అనేక మంది పాకిస్థాన్‌కు శరణార్థులుగా వచ్చారు. ఐరాస నివేదిక ప్రకారం.. దాదాపు 13 లక్షల మంది అఫ్గాన్‌ పౌరులు శరణార్థులుగా నమోదు చేసుకున్నారు. మరో 8.8 లక్షల మంది శరణార్థులుగా ధ్రువీకరణ పొందారు. వీరుకాక మరో 17 లక్షల మంది అక్రమంగా తమ దేశంలోకి చొరబడ్డారని పాకిస్థాన్‌ అంతర్గత వ్యవహారాలశాఖ మంత్రి సర్ఫరాజ్‌ బుగిటి ఇటీవల పేర్కొన్నారు. వీరందరూ ఈ నవంబరు 1వ తేదీ నాటికి దేశం విడిచిపోవాలని ఆదేశించారు. లేదంటే భద్రతా బలగాల సహాయంతో వారిని గుర్తించి బలవంతంగా పంపేస్తామని తెలిపారు. నవంబరు తర్వాత పాస్‌పోర్టు, వీసా లేకుండా దేశంలోకి ఎవరినీ అనుమతించబోమని స్పష్టం చేశారు.