ఇజ్రాయెల్‌లో మంకీపాక్స్‌ తొలి కేసు

స్విట్జర్లాండ్‌లోనూ బయటపడ్డ వ్యాధి

టెల్‌ అవీవ్‌: ప్రపంచవ్యాప్తంగా ప్రమాదకర మంకీపాక్స్‌ కేసులు పెరుగుతుండటం తీవ్ర ఆందోళన కలిగిస్తోంది. తాజాగా ఇజ్రాయెల్‌లో ఈ తరహా తొలి కేసు నమోదైంది. ఇటీవలే విదేశాల నుంచి తిరిగొచ్చిన ఓ వ్యక్తిలో మంకీపాక్స్‌ను గుర్తించినట్లు ఆ దేశ ఆరోగ్య మంత్రిత్వ శాఖ తెలిపింది. మరికొందరిలోనూ వ్యాధి లక్షణాలు కనిపిస్తుండటంతో వారికి పరీక్షలు నిర్వహిస్తున్నట్లు పేర్కొంది. పశ్చిమాసియాలో మంకీపాక్స్‌ తొలి కేసు ఇదే కావడం గమనార్హం. మరోవైపు- స్విట్జర్లాండ్‌లోనూ ఓ వ్యక్తి ఈ వ్యాధి బారిన పడినట్లు తాజాగా నిర్ధారణ అయింది. ఇప్పటికే బ్రిటన్‌, స్పెయిన్‌, పోర్చుగల్‌, ఇటలీ, అమెరికా, స్వీడన్‌, కెనడా, ఫ్రాన్స్‌, జర్మనీ, బెల్జియం, ఆస్ట్రేలియాల్లో మంకీపాక్స్‌ కేసులు బయటపడ్డాయి. 

* పలు దేశాల్లో మంకీపాక్స్‌ కేసులు వెలుగుచూడటంపై అమెరికా అధ్యక్షుడు జో బైడెన్‌ ఆందోళన వ్యక్తం చేశారు. తమ దేశంలో ఈ వ్యాధి వ్యాప్తి తీవ్రతపై ప్రస్తుతానికి స్పష్టత లేదని.. అయితే ప్రజలంతా అప్రమత్తంగా ఉండాలని ఆదివారం దక్షిణ కొరియాలో పేర్కొన్నారు.