Jinping: బ్రిక్స్‌ సదస్సులో జిన్‌పింగ్‌ అయోమయం.. వీడియో వైరల్‌!

జొహాన్నెస్‌బర్గ్‌: దక్షిణాఫ్రికాలో బ్రిక్స్ శిఖరాగ్ర సదస్సు (BRICS Summit)లో పాల్గొన్న చైనా అధినేత షీ జిన్‌పింగ్‌ (Xi Jinping)కు.. అక్కడి ఓ సభా ప్రాంగణంలో ఊహించని పరిస్థితి ఎదురైంది. తన వెంట వస్తోన్న సహాయకుడిని అక్కడి భద్రతా సిబ్బంది బలవంతంగా అడ్డుకోవడంతో.. ఏం జరుగుతోందో తెలియక ఆయన కొద్దిసేపు అయోమయానికి గురైనట్లు తెలుస్తోంది. ఈ ఘటనకు సంబంధించిన వీడియో నెట్టింట చక్కర్లు కొడుతోంది.

బ్రిక్స్‌ సదస్సులో పాల్గొనేందుకు జిన్‌పింగ్‌ ఓ హాల్‌ వైపు నడుచుకుంటూ బయల్దేరారు. మార్గమధ్యలో చైనా ప్రతినిధి ఆయన్ను అనుసరించేందుకు యత్నించారు. కానీ, ఆ హాలు ప్రవేశ ద్వారం వద్ద అక్కడి భద్రతాసిబ్బంది ఆ ప్రతినిధిని అడ్డుకున్నారు. బలవంతంగా అతడిని నిరోధిస్తున్నట్లు వీడియోలో కనిపిస్తోంది. అనంతరం ప్రవేశ ద్వారాన్ని మూసివేశారు. ఇది గమనించిన జిన్‌పింగ్‌ కాస్త ఇబ్బందిగా ముందుకెళ్లినట్టు కనిపించింది. అంతలోనే కొద్దిసేపు నిలబడిపోయారు. ఏం జరుగుతోందో తెలియని అయోమయంలో.. వెనక్కు తిరిగి చూశారు. చివరకు నడుచుకుంటూ ముందుకు వెళ్లిపోయారు. అయితే, చైనా ప్రతినిధిని ఎందుకు అడ్డుకున్నారో తెలియాల్సి ఉంది.

ముచ్చటించుకున్న మోదీ-జిన్‌పింగ్‌.. బ్రిక్స్‌లోకి కొత్తగా 6 దేశాలు..!

ఇదిలా ఉండగా.. బ్రిక్స్‌ సదస్సులో ప్రధాని నరేంద్ర మోదీ, చైనా అధినేత జిన్‌పింగ్‌ల మధ్య ప్రత్యేక భేటీ ఉంటుందా? అనే విషయంపై ఆసక్తి నెలకొన్నప్పటికీ.. అటువంటి సమావేశం జరగలేదు. కానీ, వేదికపై నడుచుకుంటూ వెళ్తున్న సమయంలో ఇరు నేతల మధ్య సంభాషణ చోటుచేసుకుంది. మోదీ ఏదో చెబుతుండగా.. జిన్‌పింగ్‌ దాన్ని వింటూ ముందుకు సాగారు. సమావేశం అనంతరం ఇద్దరు నేతలు కరచాలనం చేసుకున్నారు. దీనికి సంబంధించిన వీడియో వైరల్‌గా మారింది.