Ukraine Crisis: యూకే నుంచి ఉక్రెయిన్‌కు దీర్ఘశ్రేణి క్షిపణులు..!

ఇంటర్నెట్‌డెస్క్‌: ఉక్రెయిన్‌కు సాయంగా దీర్ఘశ్రేణి రాకెట్‌ లాంఛర్లను యూకే పంపుతోంది. ఈ విషయాన్ని ఆ దేశ రక్షణ మంత్రి బెన్‌వాలెస్‌ ధ్రువీకరించారు. తొలివిడత లాంగ్‌రేంజి ఎం270 మల్టిపుల్‌ రాకెట్‌ వ్యవస్థలను ఉక్రెయిన్‌కు అందజేస్తున్నామన్నారు. ఆ దేశ ఆత్మరక్షణకు ఈ ఆయుధం ఎంతగానో ఉపయోగపడుతుందని పేర్కొన్నారు.

మొత్తం ఎన్ని వ్యవస్థలను పంపిస్తోందో మాత్రం వెల్లడించలేదు. ప్రాథమిక సమాచారం మేరకు తొలుత మూడు రాకెట్‌ వ్యవస్థలు వెళ్లనున్నట్లు ఆ దేశ పత్రికల్లో వార్తలొస్తున్నాయి. అమెరికాతో సమన్వయం చేసుకొంటూ ఈ నిర్ణయం తీసుకొన్నట్లు పేర్కొంది. అమెరికా కూడా వీటిని ఉక్రెయిన్‌కు అందించనున్నట్లు గత వారం వెల్లడించింది. ఉక్రెయిన్‌ సైన్యంలోని కొందరికి ఈ రాకెట్ల వినియోగంపై శిక్షణ కూడా ఇవ్వనున్నట్లు పేర్కొంది. మారుతున్న వ్యూహాలకు అనుగుణంగా ఉక్రెయిన్‌కు మద్దతు చాలా అవసరమని బెన్‌ వాలెస్‌ పేర్కొన్నారు.

ఇప్పటికే ఎం270 రాకెట్లు ఇస్తామన్న అమెరికాపై రష్యా  ఆగ్రహం వ్యక్తం చేసింది. ఈ మేరకు రష్యా అధ్యక్షుడు పుతిన్‌ ఆదివారం తీవ్ర హెచ్చరికలు జారీ చేశారు. ఉక్రెయిన్‌లో రష్యా కొత్త లక్ష్యాలను ఎంచుకొని దాడులను తీవ్రం చేస్తుందని పేర్కొన్నారు.