తెలుగు రాష్ట్రాలు తడిచి ముద్దయ్యాయి

తాజావార్తలు


తెలుగు రాష్ట్రాలు తడిచి ముద్దయ్యాయి
హైదరాబాద్‌: ఇప్పటివరకు భానుడి ప్రతాపానికి అల్లాడిపోయిన తెలుగు రాష్ట్రాల ప్రజలు వాతావరణం ఒక్కసారిగా చల్లబడటంతో వూపిరి పీల్చుకుంటున్నారు. విదర్భ నుంచి కర్ణాటక, తెలంగాణ రాయలసీమ మీదుగా తమిళనాడు వరకు ఉపరితల ద్రోణి కొనసాగుతుండటంతో గురువారం అర్ధరాత్రి నుంచి శుక్రవారం ఉదయం వరకు ఆంధ్రప్రదేశ్‌, తెలంగాణల్లోని పలు చోట్ల ఓ మోస్తరు నుంచి భారీ వర్షం కురిసింది. ఉరుములు, మెరుపులు, భారీ ఈదురు గాలులతో కురిసిన వర్షానికి రోడ్లన్నీ జలమయం అయ్యాయి. పలు చోట్ల చెట్ల కొమ్మలు, విద్యుత్‌ స్తంభాలు విరిగి పడటంతో విద్యుత్‌ సరఫరాలో తీవ్ర అంతరాయం ఏర్పడింది. మరోపక్క శుక్రవారం సాయంత్రం వరకు చెదురుమదురుగా వర్షాలు కురిసే అవకాశం ఉన్నట్లు వాతావరణశాఖ అధికారులు తెలియజేశారు.
హైదరాబాద్‌లో భారీ వర్షం
హైదరాబాద్‌ నగరాన్ని వరుణుడు ముంచెత్తాడు. శుక్రవారం తెల్లవారుజాము నుంచి నగరంలోని పలు చోట్ల కుండపోత వర్షం కురసింది. మియాపూర్‌, మాదాపూర్‌, రాయదుర్గం, గచ్చిబౌలి, ఎల్బీనగర్‌, వనస్థలిపురం, హయత్‌నగర్‌ తదితర ప్రాంతాల్లో కురిసిన వర్షానికి రోడ్లన్నీ జలమయం అయ్యాయి.
ఈదురు గాలులకు పలు చోట్ల చెట్లు, విద్యుత్‌ స్తంభాలు నేలకొరిగాయి.తెలుగుతల్లి ఫ్లైఓవర్‌, సచివాలయం-ఇందిరాపార్కు మార్గంలో పలు చోట్ల చెట్లు విరిగిపడ్డాయి. దీంతో వాహనాలను దారి మళ్లిస్తున్నారు. ప్రభుత్వ ముద్రణా కార్యాలయం వద్ద భారీగా వర్షపు నీరు నిలిచిపోయింది. ముషీరాబాద్‌, చిక్కడపల్లి, ఆర్టీసీ క్రాస్‌రోడ్డు, పార్శిగుట్ట, చిలకలగూడ, అడ్డగుట్ట బేగంపేట, బోయిన్‌పల్లి, ఆల్వాల్‌, తిరుమలగిరి తదితర ప్రాంతాల్లో రోడ్లన్నీ జలమయం అయ్యాయి. రామంతాపూర్‌ చర్చి కాలనీ, కవాడిగూడ డీఎస్‌ నగర్‌ ఇళ్లలోకి మురుగునీరు వచ్చిన చేరటంలో ప్రజలు ఇబ్బందులు పడుతున్నారు.
కరీంనగర్‌ జిల్లా మంథని మార్కెట్‌లో కురిసిన వర్షానికి సుమారు 1500 క్వింటాళ్ల ధాన్యం తడిచిపోయింది.

నిలిచిన రేపల్లె-కాచిగూడ డెల్టా ప్యాసింజర్‌
నల్గొండ జిల్లా వలిగొండ మండలంలో గురువారం అర్ధరాత్రి భారీ వర్షం కురిసింది. ఈ వర్షానికి టేకులసోమారం వద్ద రైల్వే ట్రాక్‌ దెబ్బతింది. దీంతో రేపల్లె-కాచిగూడ డెల్టా ప్యాసింజర్‌ను అధికారులు నిలిపివేశారు. మరమ్మతు అనంతరం యథావిధిగా రైలును నడిపారు.

వర్షాలపై జీహెచ్‌ఎంసీ కమిషనర్‌ టెలికాన్ఫరెన్స్‌
గురువారం అర్ధరాత్రి నుంచి కురుస్తున్న వర్షాలపై జీహెచ్‌ఎంసీ కమిషనర్‌ జనార్థన్‌రెడ్డి అధికారులతో టెలికాన్ఫరెన్స్‌ నిర్వహించారు. అన్ని జోన్లు, డివిజన్ల అధికారులు, ఇంజినీరింగ్‌ సిబ్బందితో ఆయన మాట్లాడారు. తాజా పరిస్థితిని అధికారులను అడిగి తెలుసుకున్నారు. లోతట్టు ప్రాంతాల్లోని నీటిని తక్షణం బయటకు పంపేలా చూడాలన్నారు. రహదారులపై కూలిన చెట్లను వెంటనే తొలగించాలని ఆదేశించారు.

ఏపీలోనూ వర్షం.. వర్షం..
విజయవాడ: ఆంధ్రప్రదేశ్‌లోని పలు జిల్లాలో ఈదురుగాలులతో కూడిన భారీ వర్షాలు కురుస్తున్నాయి. కృష్ణాజిల్లా నూజివీడు, ఆగిరిపల్లిలో ఈదురుగాలులతో కూడిన వర్షం రావడంతో మామిడికాయలు నేలరాలాయి. దీంతో రైతులు ఆందోళన చెందుతున్నారు. విద్యుత్‌ స్తంభాలు నేలకొరగడంతో పలు చోట్ల విద్యుత్‌ సరఫరా నిలిచిపోయింది. భారీ వృక్షాలు నేలకొరిగాయి.

విజయవాడ, యనమలకుదురు, మైలవరం, నందిగామ, కంచికచర్ల, జగ్గయ్యపేట, హనుమాన్‌ జంక్షన్‌, గన్నవరం తదితర ప్రాంతాల్లో ఈదురుగాలులతో కూడిన వర్షం కురుస్తుంది.

గుంటూరు జిల్లా నరసరావుపేటలో ఉరుములు, మెరుపులతో కూడిన వర్షం కురుస్తుంది. తాడేపల్లిలో ఈదురుగాలులకు హోర్డింగ్‌ కుప్ప కూలింది. ఈ ప్రమాదంలో ఒక కూలి మృతి చెందాడు. ప్రత్తిపాడు, కాకుమాను, పెదనందిపాడు మండలాల్లో, చెరుకుపల్లిలో ఈదురుగాలులతో కూడదిన భారీవర్షం కారణంగా చెట్టు నేలకొరిగాయి. అలాగే తెనాలిలో ఈదురుగాలులతో కూడిన భారీ వర్షం కురుస్తోంది బాపట్లలో ఈదురుగాలులు వీస్తున్నాయి.

గోదావరి జిల్లాల్లో పలు చోట్ల ఈదురు గాలులతో కూడిన వర్షాలు కురుస్తున్నాయి. తాడేపల్లిగూడెం, జంగారెడ్డిగూడెంలో భారీ వర్షం కురుస్తోంది. ఏలూరులో ఈదురుగాలులు వీస్తున్నాయి. రాజమహేంద్రవరం, ఉండిలో చిరుజల్లులు పడుతున్నాయి.

ప్రకాశం జిల్లా మార్కాపురం, డోర్నాల, పెద్దారవీడు, తుర్లుపాడు, ఒంగోలు, చీరాల, అద్దంకి, పొదిలితో పాటు పలు చోట్ల ఈదురుగాలులతో కూడిన వర్షం కురుస్తోంది.

అనంతపురం జిల్లా పెనుకొండ, సోమందేపల్లి మండలాల్లో జల్లులు పడుతున్నాయి. ఈదురుగాలుల వల్ల పెనుకొండ, సోమందేపల్లి మండలాల్లో గురువారం రాత్రి నుంచి విద్యుత్‌ సరఫరా నిలిచిపోయింది. దీంతో ప్రజలు తీవ్ర ఇబ్బందులకు గురవుతున్నారు.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.