గరం మసాలా ఇలా చేయండి!

పనీర్‌, టొమాటో, బంగాళదుంప లాంటి శాకాహారాలు, చికెన్‌, మటన్‌ లాంటి మాంసాహారాలు, బిర్యానీ, ఫ్రైడ్‌ రైస్‌.. ఇలా ఏవైనా సరే స్పైసీగా ఉండాలంటే గరం మసాలా జోడించేస్తాం. ఒక్క చెంచా వేస్తే చాలు.. అద్భుతమైన రుచి వచ్చేస్తుంది. ఇంత ముఖ్యమైన గరం మసాలాని మనం ఇంట్లోనే చేసుకోవచ్చు. ఎలాగంటారా.. కడాయిలో అర కప్పు జీలకర్రను వేయించి ఒక పళ్లెంలోకి తీయాలి. సగం జాజికాయ. మిరియాలు, లవంగాలు, యాలకులు రెండు చెంచాల చొప్పున, నాలుగు బిర్యానీ ఆకులు, అంగుళమంత దాల్చినచెక్కలు 3, జాపత్రి కొద్దిగా, స్టార్‌ మొగ్గలు, బ్లాక్‌ కార్డమమ్‌లు మూడు చొప్పున తీసుకుని.. వీటిని కూడా వేయించి.. మంచి వాసన వస్తున్నప్పుడు జీలకర్ర ఉన్న పళ్లెంలోకి తీయాలి. అదే కడాయిలో అర కప్పు ధనియాలు, నాలుగు ఎండుమిర్చిలను వేయించాలి. వాటిని కూడా తీసి.. రెండు చెంచాలు సోంపు వేయించాలి. అన్నీ వేయించడం అయ్యాక.. చల్లారనిచ్చి గ్రైండ్‌ చేయాలి. అంతే ఘుమఘుమలాడే గరం మసాలా తయారైపోతుంది. దీన్ని తడి లేని, గాలి చొరబడని సీసాలో భద్రం చేస్తే.. చాన్నాళ్లు నిలవుంటుంది.