ఈ ఆవకాయ మరింత ఘాటు!

మన తెలుగువాళ్లకి ఆవకాయ పచ్చడంటే మహా ఇష్టం కదూ! మామిడికాయలతో ఆవకాయ సంగతి సరే.. పచ్చి మిరప కాయలతోనూ ఆవకాయ పచ్చడి చేయొచ్చు. ఎలాగంటారా.. కూరల్లో వేసే సన్నటివి కాకుండా.. బజ్జీ మిరపకాయలు తీసుకోవాలి. కాయలను కడిగి, శుభ్రమైన వస్త్రంతో తడి లేకుండా తుడిచి, పూర్తిగా విడిపోకుండా సగానికి చీరాలి. కారం ఎక్కువ తినలేం అనుకునేవారు విత్తనాలు తీసేయొచ్చు. ఘాటు ఇష్టపడే వారు గింజలు తీయాల్సిన పని లేదు. అర కిలో కాయలకు కప్పు ఆవాలు, అర కప్పు మెంతులు పడతాయి. వాటిని కమ్మటి వాసన వచ్చేదాకా వేయించాలి. చల్లారాక మెత్తగా గ్రైండ్‌ చేసి.. మిరపకాయల్లో వేయాలి. అలాగే కారం, ఉప్పు ఒక్కో కప్పు చొప్పున వేయాలి. పొట్టు తీసిన వెల్లుల్లి రెబ్బలు ముప్పావు కప్పు, రెండు చెంచాల పసుపు, పావు కప్పు నిమ్మ రసం, కచ్చాపచ్చా దంచిన వెల్లుల్లి ముద్ద చెంచా, ముప్పావు కిలో నువ్వుల నూనె వేసి కలపాలి. ఈ పచ్చడి మొదట కొంచెం చేదుగా ఉన్నా.. నాలుగైదు రోజుల తర్వాత మహా రుచిగా ఉంటుంది. నచ్చితే మీరూ చేసి చూడండి.