అరగంటలో ఛోలే మసాలా పౌడర్‌!

ఉడికించిన శనగలతో చేసే ఛోలే చాలా టేస్టీగా ఉంటుంది కదూ! ఆ పేరు వింటేనే నోట్లో నీళ్లూరతాయి. అది చేసేందుకు అవసరమైన ‘ఛోలే మసాలా పొడి’ మనకు కుదరదు, మాస్టర్‌ ఛెఫ్‌లు మాత్రమే తయారుచేయగలరు- అనుకుంటున్నారా? నిజానికి దాన్ని ఇంట్లోనే చేసుకోవచ్చు. అందుకోసం.. పావు కప్పు చొప్పున ధనియాలు, జీలకర్ర, రెండు చెంచాల చొప్పున మిరియాలు, ఆమ్‌చూర్‌, మెంతి ఆకు పొడి, చెంచా చొప్పున సోంపు, షాజీరా, లవంగాలు, పసుపు, రెండు నల్ల యాలకులు, అంగుళం సైజు దాల్చినచెక్క, కొద్దిగా జాపత్రి, 10 ఎండుమిరపకాయలు అవసరమవుతాయి.

కడాయిలో ధనియాలు, జీలకర్ర, మిరియాలు, దాల్చినచెక్క, నల్ల యాలకులు, లవంగాలు, సోంపు, షాజీరా, జాపత్రిలను సన్న సెగ మీద మంచి వాసన వచ్చేవరకూ వేయించాలి. చివర్లో ఎండుమిరపకాయలు కూడా వేయించి దించేయాలి. పూర్తిగా చల్లారాక ఆమ్‌చూర్‌, మెంతి ఆకుల పొడి, పసుపు జతచేసి మెత్తగా గ్రైండ్‌ చేయాలి. అంతే.. ‘ఛోలే మసాలా పౌడర్‌’ రెడీ. దీన్ని తడి లేని, గాలి చొరబడని డబ్బాలో నిలవచేసుకుంటే అవసరమైనప్పుడు వాడుకోవచ్చు.