సాంబార్‌ పౌడర్‌ ఇంట్లోనే!

కూర, పచ్చడితో అన్నం తినేశాక కాస్త సాంబార్‌ ఉంటే ఎంత బాగుంటుంది కదూ! ఆ నోరూరించే సాంబార్‌ను ఇంట్లోనే చేసినా.. అందుకు అవసరమైన పొడిని మాత్రం చాలామందికి కొనుక్కోవడమే అలవాటు. అందుకు బదులుగా ఇంట్లోనే సులువుగా చేసుకోవచ్చు. ఎలాగంటారా.. పావు కప్పు శనగపప్పు, రెండు చెంచాల మినప్పప్పు, 2 టేబుల్‌స్పూన్ల జీలకర్ర, అర టేబుల్‌స్పూన్‌ ఆవాలు, అర కప్పు ధనియాలు, ఒకటిన్నర చెంచా మెంతులు, చెంచా మిరియాలు, అర చెంచా చొప్పున ఇంగువ, పసుపు, 10 ఎండు మిరపకాయలు, 15 కరివేపాకు రెబ్బలు తీసుకోవాలి.

ముందుగా కడాయిలో ధనియాలు, జీలకర్రలను సన్న సెగ మీద రెండు నిమిషాలు వేయించాలి. మంచి వాసన వస్తుండగా వాటిని పü˘్లంలోకి తీసి, ఎండుమిరపకాయలు కొన్ని క్షణాలు వేయించాలి. వాటిని తీసి మెంతులు, అవి వేగాక మిరియాలు, అవి వేగాక శనగపప్పు, తర్వాత మినప్పప్పు, తర్వాత కరివేపాకు, అది కూడా వేగాక ఆవాలను వేయించి తీయాలి. స్టవ్వు కట్టేసి.. కడాయిలో ఇంగువ వేయాలి. ఆ వేడికి మంచి వాసన వస్తుంది. ఈ వేయించిన దినుసులన్నీ చల్లారాక పసుపు జోడించి గ్రైండ్‌ చేయాలి. జార్‌ చిన్నగా ఉంటే రెండు మూడు దఫాలుగా చేయొచ్చు. మెత్తగా అయ్యాక బాగా కలిపి తడి లేని సీసాలో భద్రం చేసుకోవాలి.