‘మా బడి మాకు కావాలి’

పాఠశాల ఎదుట ధర్నా

లింగాయపాలెం (తుళ్ళూరు), న్యూస్‌టుడే: ఉన్న బడిని వదిలి కనీసం రోడ్డు సౌకర్యం లేని గ్రామంలోని పాఠశాలకు తమ పిల్లలను ఎలా పంపించాలంటూ గుంటూరు జిల్లా తుళ్ళూరు మండలంలోని లింగాయపాలెం గ్రామస్థులు మంగళవారం ధర్నాకు దిగారు. లింగాయపాలెం గ్రామంలోని ప్రాథమిక పాఠశాలలో ఒకటి నుంచి ఐదో తరగతి వరకు 59 మంది విద్యార్థులు చదువుకుంటున్నారు. వీరిలో 3, 4, 5 తరగతుల విద్యార్థులు 46 మందిని పక్క గ్రామం రాయపూడిలోని శ్రీకృష్ణదేవరాయలు జడ్పీ ఉన్నత పాఠశాలలో విలీనం చేస్తూ విద్యాశాఖ అధికారులు ప్రకటన జారీ చేశారు. దీనిపై ఆగ్రహించిన విద్యార్థుల తల్లిదండ్రులు పాఠశాల విద్యా కమిటీ ఛైర్మన్‌ ఐనవోలు చంటిబాబు నేతృత్వంలో మంగళవారం బడి ఎదుట ధర్నా చేపట్టారు. ఈ విషయంలో విద్యాశాఖ నిర్ణయాన్ని మార్చుకునే వరకు పోరాటం తప్పదని ఆయన అన్నారు.