రాష్ట్రంలో ‘ఎయిడ్స్‌’ ప్రభావం తగ్గుతోంది

ఈనాడు, అమరావతి: ఎయిడ్స్‌ బారిన పడిన వారి సంఖ్య, మరణిస్తున్న వారి సంఖ్య రాష్ట్రంలో గణనీయంగా తగ్గిందని రాష్ట్ర ఎయిడ్స్‌ నియంత్రణ సంస్థ ప్రాజెక్టు డైరెక్టర్‌ జీఎస్‌ నవీన్‌కుమార్‌ వెల్లడించారు. ప్రపంచ ఎయిడ్స్‌ దినం (డిసెంబరు 1) సందర్భంగా బుధవారం విడుదల చేసిన ప్రకటనలో సంస్థాపరంగా తీసుకుంటున్న చర్యల్లో సాధారణ జనాభాలో హెచ్‌ఐవీ పాజిటివిటీ 6.74% (2010-11) నుంచి 0.87% (2022-23)కి తగ్గిందని నవీన్‌కుమార్‌ పేర్కొన్నారు. గర్భిణుల్లో హెచ్‌ఐవీ పాజిటివిటీ 0.46% (2010-11) నుంచి 0.05% (2022-23)కి తగ్గిందన్నారు. ప్రస్తుతం రాష్ట్రంలో 2,09,888 మంది హెచ్‌ఐవీ బాధితులు ఉన్నారని తెలిపారు.