Bengaluru: పాపం పసివాడు.. అమ్మ శాశ్వత నిద్రలో ఉందని తెలియక..

బెంగళూరు: తన తల్లి తిరిగిరాని లోకాలకు వెళ్లిపోయిందని తెలియక ఓ పసివాడు ఇంట్లో ఆమె మృతదేహం పక్కనే రెండు రోజులు గడిపాడు. ఈ హృదయ విదారక ఘటన బెంగళూరు(Bengaluru)లో వెలుగు చూసింది. అనారోగ్యంతో బాధపడుతున్న తన తల్లి నిద్ర పోతోందని భావించిన ఆ 11ఏళ్ల బాలుడు ఆమె శాశ్వత నిద్రలోకి వెళ్లిందని, ఇక తిరిగిరాదన్న విషయాన్ని గ్రహించలేకపోయాడు. ఈ ఘటనపై పోలీసులు తెలిపిన వివరాల ప్రకారం.. బెంగళూరులోని ఆర్‌టీ నగర్‌లో నివాసం ఉంటున్న అన్నమ్మ (44) అనే మహిళ కొంతకాలంగా హైపర్‌ టెన్షన్‌, డయాబెటిస్‌తో బాధపడుతూ ఇంట్లో నిద్రలోనే ప్రాణాలు కోల్పోయింది. అయితే, ఆ బాలుడు మాత్రం రోజూ తన స్నేహితులతో కలిసి బయటకు వెళ్లి ఆడుకుంటూ, వారితోపాటే భోజనం చేసి ఇంటికి వస్తుంటాడు. ఈ క్రమంలో తన తల్లి మాట్లాడటంలేదని.. రెండు రోజులుగా నిద్రలోనే ఉందని తోటి స్నేహితులతో చెప్పాడు. దీంతో వారు ఇంటికి వెళ్లి ఈ విషయాన్ని తమ తల్లిదండ్రులకు తెలిపారు. వారు బాలుడి ఇంటికి వెళ్లి చూడగా.. అప్పటికే ఆమె మృతి చెందింది. పోలీసులకు సమాచారం అందించడంతో చట్టపరమైన లాంఛనాలు పూర్తిచేసి అంత్యక్రియలు నిర్వహించారు.