సల్మాన్‌ ఇంటి వద్ద కాల్పుల కేసులో మరో నిందితుడి అరెస్టు

ముంబయి: బాలీవుడ్‌ నటుడు సల్మాన్‌ఖాన్‌ ఇంటి వద్ద జరిగిన కాల్పుల ఘటనకు సంబంధించి ముంబయి క్రైమ్‌ బ్రాంచ్‌ పోలీసులు మరొకరిని అరెస్టు చేశారు. కాల్పులకు పాల్పడిన సాగర్‌ పాల్‌, విక్కీ గుప్తాలకు ఆర్థిక సాయం చేశాడనే ఆరోపణలపై లారెన్స్‌ బిష్ణోయ్‌ ముఠాకు చెందిన మొహమ్మద్‌ రఫీక్‌ చౌధరి (37) అనే వ్యక్తిని రాజస్థాన్‌లో అదుపులోకి తీసుకున్నారు. అతడు సాగర్‌ పాల్‌, విక్కీ గుప్తాలతో నిరంతరం సంప్రదింపులు జరిపినట్లు గుర్తించామని పోలీసులు తెలిపారు. అంతే కాకుండా నిందితుడు ఘటన జరగడానికి ముందు అయిదు సార్లకు పైగా సల్మాన్‌ ఇంటి వద్ద రెక్కీ నిర్వహించాడని పేర్కొన్నారు. తాజా అరెస్టుతో కాల్పుల ఘటనకు సంబంధించి పోలీసులు అదుపులోకి తీసుకున్నవారి సంఖ్య ఐదుకు చేరింది.