Minor Girl: ఉచిత ఫోన్‌ ఆశ చూపి.. మైనర్‌ బాలికపై ప్రభుత్వ ఉద్యోగి అత్యాచారం

జైపుర్‌: రాజస్థాన్‌ (Rajasthan)లో అమానవీయ ఘటన చోటు చేసుకుంది. కరౌలీ (Karauli) జిల్లా తోడాభిమ్‌ ప్రాంతంలో మైనర్‌ బాలికపై ప్రభుత్వ ఉద్యోగి అత్యాచారానికి పాల్పడ్డాడు. రాష్ట్ర ప్రభుత్వం ఉచితంగా ఫోన్‌లు పంపిణీ చేస్తుందని ఆశ చూపి 17 ఏళ్ల బాలికపై అత్యాచారానికి పాల్పడినట్లు పోలీసులు తెలిపారు. 

కరౌలీ జిల్లా పోలీసులు తెలిపిన వివరాల ప్రకారం..  సునీల్‌ కుమార్‌ జన్‌గిడ్‌ అనే వ్యక్తి రాష్ట్ర ప్రజారోగ్య శాఖ ఇంజినీరింగ్ విభాగంలో క్యాషియర్‌గా పనిచేస్తున్నాడు. తోడాభిమ్‌ ప్రాంతానికి చెందిన మైనర్‌ బాలిక తల్లిదండ్రులు రోజు వారీ కూలీలు. శనివారం వారు పనికి వెళ్లడంతో బాలిక ఇంట్లో ఒంటరిగా ఉంది. ఈ విషయం గమనించిన సునీల్‌ కుమార్‌.. ఆమె ఇంటికి వెళ్లి ప్రభుత్వం ఉచితంగా మొబైల్‌ ఫోన్‌లు పంపిణీ చేస్తోందని చెప్పాడు. బాలిక తనతోపాటు వస్తే ఫోన్ ఇప్పిస్తానని చెప్పి.. ఆమెను తన వాహనంపై ఎక్కించుకుని దగ్గరల్లోని ప్రభుత్వ కార్యాలయానికి తీసుకెళ్లాడు. అక్కడ ఓ గదిలో తనపై అత్యాచారానికి పాల్పడినట్లు బాలిక ఫిర్యాదులో పేర్కొంది. 

అత్యాచార సమయంలో  ప్రతిఘటించడంతో నిందితుడు కత్తితో చేతులపై దాడి చేశాడని ఫిర్యాదులో పేర్కొంది. అనంతరం బాలికను ఆమె ఇంటి సమీపంలో విడిచిపెట్టి వెళ్లిపోయాడు. గాయాలతో ఇంటికి చేరుకున్న బాలిక తల్లిదండ్రులకు విషయం చెప్పడంతో వారు పోలీస్‌ స్టేషన్‌లో ఫిర్యాదు చేశారు. నిందితుడిపై పోక్సో కేసు నమోదు చేసి అరెస్టు చేసినట్లు పోలీసులు  తెలిపారు.