పెళ్లికి నిరాకరించారని ప్రేమ జంట ఆత్మహత్య

మిడ్జిల్‌:  కుటుంబ సభ్యులు తమ పెళ్లికి నిరాకరించారని ఓ ప్రేమ జంట బలవన్మరణానికి పాల్పడింది. ఈ సంఘటన మహబూబ్‌నగర్‌ జిల్లా మిడ్జిల్‌ మండలం వేముల గ్రామంలో చోటుచేసుకుంది. పోలీసులు తెలిపిన వివరాల ప్రకారం.. గ్రామానికి చెందిన ఓ యువకుడు (19), బాలిక(15) ఇద్దరు గత మూడేళ్లుగా ప్రేమించుకుంటున్నారు. కాగా వీరి ప్రేమ వ్యవహారం పెద్దలకు తెలిసింది. వారి కులాలు వేర్వేరు కావడంతో కుటుంబ సభ్యులు పెళ్లికి నిరాకరించారు. ఈ క్రమంలో శనివారం రాత్రి ఇంట్లో నుంచి వెళ్లిన ఇరువురు ఆదివారం సాయంత్రం  గ్రామ శివారులోని మామిడి తోటలో ఉరివేసుకుని బలవన్మరణానికి పాల్పడ్డారు. సమాచారం తెలుసుకున్న ఎస్సై సురేష్ సంఘటనా స్థలానికి చేరుకుని మృతదేహాలను పోస్టు మార్టం నిమిత్తం ఆస్పత్రికి తరలించారు. కేసు నమోదు చేసుకున్న పోలీసులు దర్యాప్తు చేపట్టారు.