Kota Suicides: ‘కోటా’లో ఆగని ఆత్మహత్యలు.. 8 నెలల్లో 17 మంది..!

కోటా: రాజస్థాన్‌లోని కోటాలో విద్యార్థులు వరుస ఆత్మహత్యలు (Kota Suicides) కలవరపెడుతున్నాయి. రెండు, మూడు వారాలకు ఒక ఆత్మహత్య కేసు నమోదవుతోంది. ఈ క్రమంలో మెడికల్‌ ప్రవేశ పరీక్షకు సిద్ధమవుతోన్న మరో విద్యార్థి కూడా బలవన్మరణానికి పాల్పడ్డాడు. అతడిని ఉత్తర్‌ప్రదేశ్‌కు చెందిన మన్‌జ్యోత్‌ గుర్తించారు. ఈ ఏడాదిలో ఇప్పటి వరకు 17 మంది విద్యార్థులు ప్రాణాలు తీసుకోవడం ఆందోళన కలిగిస్తోంది.

ఉత్తర్‌ప్రదేశ్‌ రామ్‌పుర్‌కు చెందిన మన్‌జ్యోత్‌ ఛబ్రా.. మెడికల్‌ ఎంట్రాన్స్‌ ఎగ్జామ్‌ (NEET) శిక్షణ కోసం ఈ ఏడాది జనవరిలో కోటాకు వచ్చాడు. నీట్‌ కోచింగ్‌ తీసుకుంటున్న అతడు.. గురువారం ఉదయం తన హాస్టల్‌ రూమ్‌లో విగతజీవిగా కనిపించాడు. ఆస్పత్రికి తీసుకెళ్లగా అప్పటికే ప్రాణాలు కోల్పోయినట్లు వైద్యులు ధ్రువీకరించారు.

సీమా హైదర్‌కు సినిమా ఛాన్స్‌.. ఏ పాత్రలో నటించనుందంటే..?

వివిధ ఎంట్రెన్స్‌ టెస్టులు, పోటీపరీక్షల కోచింగ్‌ సెంటర్లకు ప్రసిద్ధి చెందిన ‘కోటా’లో.. పొరుగు రాష్ట్రాల నుంచి ఏటా వేల మంది విద్యార్థులు శిక్షణ పొందుతారు. ఈ ఏడాది దాదాపు 2.5లక్షల మంది అక్కడ శిక్షణ తీసుకుంటున్నట్లు అంచనా. ఈ క్రమంలోనే అక్కడ విద్యార్థులు ఆత్మహత్యలు పెరగడం ఆందోళన కలిగిస్తోంది. గతేడాది 15 మంది విద్యార్థులు బలవన్మరణానికి పాల్పడగా.. ఈ ఏడాది ఇప్పటికే ఆ సంఖ్య 17కు చేరడం గమనార్హం. అంతకుముందు కూడా పదుల సంఖ్యలో ఆత్మహత్యలు చోటుచేసుకున్నాయి. వీటితోపాటు అనేక ఘటనల్లో విద్యార్థులు ఆత్మహత్యకు యత్నించిన సందర్భాలూ ఉన్నాయి. అయితే, ఒత్తిడితోనే ఇలా బలవన్మరణానికి పాల్పడుతున్నారనే వాదనలు వినిపిస్తున్నాయి.