కొవిడ్‌ కేంద్రం నుంచి ఇద్దరు ఖైదీలు పరారీ

ఏలూరు నేరవార్తలు : కొవిడ్‌ కేర్‌ సెంటర్‌ నుంచి ఇద్దరు ఖైదీలు పరారయ్యారు. పశ్చిమ గోదావరి జిల్లా ఏలూరులో ఈ రోజు తెల్లవారుజమున ఈ ఘటన చోటుచేసుకుంది. జిల్లా జైలర్‌ వేణుగోపాల్‌రెడ్డి తెలిపిన వివరాల ప్రకారం.. జంగారెడ్డిగూడెం, భీమవరానికి చెందిన ఇద్దరు నిందితులు పలు చోరీ కేసుల్లో అరెస్టయి ఏలూరు జిల్లా జైలులో ఏడాది నుంచి రిమాండ్‌ ఖైదీలుగా ఉంటున్నారు.

ఈ నెల 21న జైలులోని 74 మంది ఖైదీలకు కొవిడ్‌ పరీక్షలు నిర్వహించగా వారిలో 13 మందికి పాజిటివ్‌గా నిర్ధారణ అయ్యింది. వారందరికి అదే రోజు రాత్రి ఏలూరు శివారు ఒట్లూరులో ఉన్న కొవిడ్‌ కేర్‌ సెంటర్‌కు తరలించారు. ఈ నేపథ్యంలో ఏలూరు సీఆర్‌రెడ్డి ఇంజినీరింగ్‌ కళాశాల కొవిడ్‌ కేర్‌ సెంటర్‌లో ఉన్న జంగారెడ్డి, భీమవరానికి చెందిన ఇద్దరు ఖైదీలు ఎస్కార్ట్‌ కళ్లుగప్పి శనివారం తెల్లవారుజామున పరారయ్యారు. సమాచారం తెలుసుకున్న పోలీసులు వారికోసం గాలింపు చర్యలు చేపట్టారు. కొవిడ్‌ సెంటర్‌లో చికిత్స పొందుతున్న మిగిలిన ఖైదీలకు ఎస్కార్ట్‌ను అప్రమత్తం చేశారు.