అక్రమార్కులకు అధికార పార్టీ అండ

అడవి అగ్రహారంలో పొక్లెయిన్‌తో తవ్వకాలు 

చీడికాడ, న్యూస్‌టుడే: చీడికాడ మండలంలో గ్రావెల్‌ అక్రమ తరలింపు పెద్దఎత్తున జరుగుతోంది. అక్రమార్కులకు అధికార పార్టీ అండదండలు పుష్కలంగా ఉండటంతో అధికారులు చూసీచూడనట్లు వదిలేస్తున్నారని ఆరోపణలు వినిపిస్తున్నాయి. చీడికాడ మండలంలోని అడవి అగ్రహారం, బైలపూడి, జి.కొత్తపల్లి, చినగోగాడ ప్రాంతాల్లో కంకర గుట్టలున్నాయి. వేసవి కావడంతో చుట్టుపక్కల ప్రాంతాల్లో నిర్మాణ పనులు జోరుగా సాగుతున్నాయి. దీంతో గ్రావెల్‌కు డిమాండ్‌ పెరిగింది. దీనిని ఆసరాగా చేసుకుని ఇష్టారాజ్యంగా గ్రావెల్‌ తవ్వేస్తున్నారు. పొక్లెయిన్‌తో రాత్రీ, పగలు తేడాలేకుండా తవ్వకాలు సాగిస్తున్నారు. ఇతర ప్రాంతాలకు పదుల సంఖ్యలో ట్రాక్టర్లతో తరలిస్తున్నారు. సాధారణ రోజుల కన్నా.. అధికారులు ఎన్నికల విధుల్లో ఉన్నప్పుడు, సెలవు రోజుల్లో ఈ వ్యవహారం విచ్చలవిడిగా సాగుతోంది. శుక్రవారం అడవి అగ్రహారం, బైలపూడి ప్రాంతాల్లో  పెద్దఎత్తున తవ్వకాలు చేపట్టారు. భారీ లోడుతో వాహనాలు రాకపోకలు సాగిస్తుండటంతో రహదారులు సైతం పాడవుతున్నాయి. గ్రావెల్‌ అక్రమ తవ్వకాలపై రెవెన్యూ ఇన్‌స్పెక్టర్‌ కృష్ణంరాజు దృష్టికి తీసుకెళ్లగా ఆ ప్రాంతాన్ని పరిశీలించారు. గ్రావెల్‌ తవ్వకాలపై తహసీల్దారుకు నివేదిక పంపుతామని ఆయన తెలిపారు.