ప్రాణం తీసిన వివాహేతర సంబంధం

రామచంద్రపురం (అవనిగడ్డ గ్రామీణం), న్యూస్‌టుడే: వివాహేతర సంబంధం నేపథ్యంలో దక్షిణ చిరువోలులంకకు చెందిన బచ్చు శ్రీనివాసరావు (33) 25న రాత్రి దారుణ హత్యకు గురైన ఘటన రామచంద్రాపురంలో చోటుచేసుకుంది. అవనిగడ్డ ఇన్‌ఛార్జి సీఐ రవికుమార్‌ తెలిపిన మేరకు.. దక్షిణ చిరువోలులంకకు చెందిన శ్రీనివాసరావు వ్యవసాయ పనులు చేస్తుంటారు.ఆయనకు రామచంద్రాపురంలోని ఓ వివాహితతో కొంత కాలంగా వివాహేతర సంబంధం కొనసాగుతోంది. ఈ నేపథ్యంలో 25న రాత్రి శ్రీనివాసరావు ఆమె ఇంటికి వెళ్లగా తనకు ఇష్టం లేదని నిరాకరించింది. ఈ విషయమై జరిగిన ఘర్షణలో ఆమె తండ్రి, మరికొందరు కలిసి దాడి చేయడంతో శ్రీనివాసరావు మరణించారు. మృతుడు శ్రీనివాసరావు భార్య బచ్చు ఉషారాణి ఫిర్యాదు మేరకు సోమవారం పోలీసులు కేసు నమోదు చేశారు. నాగాయలంక ఎస్సై కుడిపూడి శ్రీనివాసు మృతదేహాన్ని పోస్టుమార్టం నిమిత్తం అవనిగడ్డ ప్రభుత్వ వైద్యశాలకు తరలించారు.