gold jewels: రూ.కోట్ల విలువైన బంగారు ఆభరణాలతో వెళ్తున్న కంటెయినర్‌ బోల్తా.. తర్వాత ఏమైందంటే?

(ప్రతీకాత్మక చిత్రం)

ఈరోడ్‌: రూ.వందల కోట్ల విలువ చేసే  బంగారు ఆభరణాలను తరలిస్తున్న కంటెయినర్‌ బోల్తా పడిన ఘటన తమిళనాడులో చోటుచేసుకుంది. తమిళనాడులోని ఈరోడ్‌ సమీపంలో చిటోడేలో 810 కిలోల పసిడితో వెళ్తున్న ఓ ప్రైవేటు కంటెయినర్‌ సోమవారం రాత్రి బోల్తా పడినట్లు పోలీసులు వెల్లడించారు.  అందులో ఉన్న బంగారు ఆభరణాల విలువ రూ.666 కోట్లు ఉంటుందని అంచనా వేస్తున్నారు. ఈ ఘటనపై పోలీసులు తెలిపిన వివరాల ప్రకారం.. ఓ ప్రైవేటు లాజిస్టిక్స్‌ సంస్థకు చెందిన  కంటెయినర్‌ బంగారు ఆభరణాలను లోడ్‌ చేసుకొని కోయంబత్తూరు నుంచి సేలంకు బయల్దేరింది. సమతువపురం సమీపంలోకి రాగానే డ్రైవర్‌ వాహనంపై నియంత్రణ కోల్పోవడంతో వాహనం అదుపు తప్పి బోల్తా పడింది. ఈ ఘటనలో డ్రైవర్‌ శశికుమార్‌తో పాటు సెక్యూరిటీ గార్డు బాల్‌రాజ్‌ కిందపడిపోవడంతో గాయపడ్డారు. 

ఊటీ, కొడైకెనాల్‌ వెళ్లేందుకు ఈ-పాస్‌ తప్పనిసరి

ఈ ఘటనపై సమాచారం అందుకున్న చిటోడే పోలీసులు ఘటనా స్థలానికి చేరుకొని క్షతగాత్రులను సమీపంలోని ఆస్పత్రికి తరలించారు. అయితే, కంటెయినర్‌ లోపల ఉన్న బంగారు ఆభరణాలు సురక్షితంగానే ఉన్నట్లు పోలీసులు తెలిపారు. ఈ ఘటనపై సంబంధిత యజమానులకు సమాచారం ఇవ్వడంతో వారు హుటాహుటిన అక్కడికి కొత్త కంటెయినర్‌ను పంపించగా.. బోల్తా పడిన వాహనంలోని ఆభరణాలను అందులోకి ఎక్కించి సేలంకు తరలించినట్లు తెలిపారు. ఈ ఘటనపై కేసు నమోదు చేసి దర్యాప్తు చేస్తున్నట్లు చిటోడే పోలీసులు తెలిపారు.