PM Modi: ప్రధాని మోదీని కలిసిన మాజీ ప్రధాని పీవీ కుటుంబం

హైదరాబాద్‌: దివంగత మాజీ ప్రధాని పీవీ నరసింహారావు కుటుంబ సభ్యులు ప్రధాని నరేంద్ర మోదీ(PM Modi)ని హైదరాబాద్‌లో మంగళవారం కలిశారు. ఇటీవల పీవీకి కేంద్రం దేశ అత్యున్నత పౌర పురస్కారం భారతరత్న ఇచ్చినందుకు గాను ఆయనకు కృతజ్ఞతలు తెలిపారు. ఈ భేటీకి సంబంధించిన ఫొటోలను ప్రధాని నరేంద్ర మోదీ ‘ఎక్స్‌’లో షేర్‌ చేశారు. హైదరాబాద్‌లో మాజీ ప్రధాని పీవీ నరసింహారావు కుటుంబంతో గొప్ప సమావేశం జరిగిందని ప్రధాని మోదీ పేర్కొన్నారు. పీవీని భారతరత్నతో గౌరవించినందుకు ఆ కుటుంబం కేంద్ర ప్రభుత్వానికి ధన్యవాదాలు తెలియజేసిందని పేర్కొన్నారు. ఈ సందర్భంగా పలు అంశాలపై సుదీర్ఘంగా చర్చించామని తెలిపారు. కొన్నేళ్లుగా దేశం పురోగమించడంపై ఆ కుటుంబం సంతోషం వ్యక్తం చేసిందని వెల్లడించారు.  భారతీయ సంస్కృతీ సంప్రదాయాలు సుసంపన్నం కావడంపైనా ఈ సమావేశంలో చర్చించినట్లు ప్రధాని పేర్కొన్నారు.