ట్యూటర్‌ కొడితే బాలిక చెయ్యి విరిగింది

ఆలస్యంగా వెలుగులోకి వచ్చిన వైనం

బాలికను విచారిస్తున్న సాంఘిక సంక్షేమాధికారి

జగ్గయ్యపేట, న్యూస్‌టుడే: వసతిగృహంలో ట్యూటర్‌ కొట్టడంతో ఓ బాలిక చేయి విరిగింది. పట్టణంలోని సమీకృత బాలికల వసతిగృహంలో 15 రోజుల క్రితం జరిగిన సంఘటనపై విద్యార్థిని తల్లిదండ్రులు ఇచ్చిన ఫిర్యాదు మేరకు సాంఘిక సంక్షేమ శాఖ అధికారి వెంకటేశ్వరరావు సోమవారం రాత్రి విచారణ చేపట్టడంతో విషయం వెలుగులోకి వచ్చింది. విచారణాధికారి తెలిపిన వివరాల మేరకు.. గంపలగూడెం మండలానికి చెందిన ఓ బాలిక జగ్గయ్యపేటలోని వసతిగృహంలో ఉండి పక్కనే ఉన్న జడ్పీ పాఠశాలలో 8వ తరగతి చదువుతోంది. వసతిగృహంలో ట్యూటర్‌గా పనిచేసే యువతి ఈనెల 7న బాలికను కర్రతో కొట్టడంతో తీవ్రమైన నొప్పితో విలవిల్లాడింది. రెండు రోజులైనా నొప్పి తగ్గక పోవడంతో స్నేహితుల ప్రోద్బలంతో ఆమెను ఆసుపత్రికి తీసుకెళ్లగా చేయి విరిగిందని వైద్యులు నిర్ధారించారు. దీంతో తల్లిదండ్రులను పిలిపించి బాలికను ఇంటికి పంపారు. ఈ విషయమై బాలిక తల్లిదండ్రులు గంపలగూడెంలో స్పందనలో ఫిర్యాదు చేయడంతో సాంఘిక సంక్షేమాధికారి విచారణ చేపట్టారు. బాలికను గాయపరిచింది దినసరి వేతనంపై ట్యూటర్‌గా పని చేసే యువతి అని, ఆమెను విధుల నుంచి ఇప్పటికే తొలగించామని వార్డెన్‌ సుల్తానా వివరణ ఇచ్చారు. గాయపర్చడమే కాకుండా ఇదేమని అడిగిన తమపై ట్యూటర్‌ అసభ్యంగా మాట్లాడారని కూడా తల్లిదండ్రులు ఫిర్యాదు చేశారు. విచారణ నివేదికను ఉన్నతాధికారులకు నివేదించనున్నట్లు వెంకటేశ్వరరావు తెలిపారు.