చిత్రవార్తలు

కదలని బస్సు..

కార్గో గురించి ప్రజల మదిలో నాటుకుపోయేలా, చదువు ప్రాముఖ్యం విద్యార్థులకు తెలియజెప్పేందుకు ఆర్టీసీ, ప్రభుత్వ పాఠశాల సిబ్బంది వేయించిన చిత్రాలు ఇవి. గౌలిగూడ సీబీఎస్‌ లోకల్‌ బస్టాండ్‌ వద్ద ఒక గదిలో కార్గో సర్వీసు కేంద్రాన్ని నిర్వహిస్తున్నారు. అక్కడ గోడపై వేసిన బస్సు బొమ్మ ప్రయాణికులను ఆకర్షిస్తుంది. మరోవైపు సికింద్రాబాద్‌ ఓల్డ్‌ నల్లగుట్టలోని ప్రభుత్వ పాఠశాలకు ఆకాశమే హద్దుగా చదువుతో సాగిపో అంటూ వేసిన చిత్తరువు చూపరులను ఆకట్టుకుంటోంది.

పేదల పేరుతో పెద్దల ఆక్రమణ

మూసీలో ఆక్రమణలు పెరిగిపోతున్నాయి. గతేడాది మూసారాంబాగ్‌ వంతెన మునిగి పైనుంచి వరద పోటెత్తింది. నది ఒడ్డున పేదల గుడిసెలు నీట మునగడంతో రెవెన్యూ అధికారులు స్పందించి నగర శివారు మునగనూరులో సుమారు 262 కుటుంబాలకు రెండు పడక గదుల ఇళ్లు కేటాయించారు. కొందరు స్థానిక నాయకులు మూసీకి మరో పక్క వారం రోజుల క్రితం తాత్కాలికంగా రేకుల షెడ్లు వేశారు. ఏమని అడిగితే తమకు రెండు పడకల ఇళ్లు కేటాయించలేదని సమాధానమిస్తున్నారు.  మూసారాంబాగ్‌ వంతెన సమీపంలో పలు అభివృద్ధి పనులు జరుగుతుండడంతో భూముల విలువ పెరుగుతోంది. మూసీపై కన్నేసిన కొందరు ఆక్రమణలకు పాల్పడుతున్నారని స్థానికులు ఆరోపిస్తున్నారు.