టింబర్‌ డిపో లైసెన్సుకు లంచం

అనిశాకు చిక్కిన అటవీ శాఖ అధికారులు

శ్యామ్‌కుమార్‌, పీర్యానాయక్‌

కాటేదాన్‌, న్యూస్‌టుడే: రంగారెడ్డి జిల్లా శంషాబాద్‌ ఫారెస్ట్‌ రేంజ్‌ అధికారులు టింబర్‌ డిపో ఏర్పాటుకు అనుమతిచ్చేందుకు రూ.80వేల తీసుకుంటూ అవినీతి నిరోధక శాఖ అధికారులకు పట్టుబడ్డారు. అనిశా డీఎస్పీ సూర్యనారాయణ తెలిపిన వివరా ప్రకారం.. కొత్వాల్‌గూడలో టింబర్‌ డిపో ఏర్పాటు కోసం వెంకటేష్‌ అనే కట్టెల వ్యాపారి రాజేంద్రనగర్‌ సర్కిల్‌ మైలార్‌దేవుపల్లి డివిజన్‌ గగన్‌పహాడ్‌లోని శంషాబాద్‌ ఫారెస్ట్‌ రేంజ్‌ కార్యాలయంలో ఇటీవల దరఖాస్తు చేశారు. ఇందుకు రేంజ్‌ అధికారి శ్యామ్‌కుమార్‌, సెక్షన్‌ అధికారి పీర్యానాయక్‌ రూ.80వేలు ఇస్తే లైసెన్స్‌ మంజూరయ్యేలా చేస్తామన్నారు. సరేనన్న వెంకటేష్‌ అనిశా అధికారులకు సమాచారం అందించారు. బుధవారం ఫారెస్ట్‌ రేంజ్‌ కార్యాలయానికి వెళ్లిన వెంకటేష్‌ ఇద్దరు అధికారులకు రూ.80వేల నగదును అందించారు. అక్కడే వేచి ఉన్న అనిశా అధికారులు వారిపై దాడులు చేశారు. నగదుతో సహా ఇద్దరినీ అదుపులోకి తీసుకున్నారు. వారాసిగూడలోని శ్యామ్‌కుమార్‌, షాద్‌నగర్‌లోని పీర్యానాయక్‌ నివాసాల్లో సోదాలు చేపడుతున్నామని డీఎస్‌పీ తెలిపారు. వారిని అనిశా కోర్టులో హాజరు పరుస్తామని వెల్లడించారు.