మటన్‌ మండీ తిని పలువురికి అస్వస్థత

మాషాఅల్లా హోటల్‌ మూసివేత

ఆహార పదార్థాల శాంపిళ్లను సేకరిస్తున్న అధికారులు

సనత్‌నగర్‌, న్యూస్‌టుడే: మటన్‌ మండీ తిని పలువురు అస్వస్థత గురైన సంఘటన ఆలస్యంగా వెలుగు చూసింది. దీంతో గురువారం సనత్‌నగర్‌ డీఎన్‌ఎం కాలనీలోని మాషాఅల్లా హోటల్‌ను జీహెచ్‌ఎంసీ ఆహార తనిఖీ అధికారులు సీజ్‌ చేశారు. జీహెచ్‌ఎంసీ ఖైరతాబాద్‌ సర్కిల్‌ ఏఎంఓహెచ్‌ డా.భార్గవ నారాయణ వివరాలిలా ఉన్నాయి. ఫతేనగర్‌ ఫ్లైఓవర్‌ బ్రిడ్జి కింద డీఎన్‌ఎం కాలనీలో ఉన్న మాషాఅల్లా మండీ హోటల్‌లో మంగళవారం రాత్రి సనత్‌నగర్‌, అల్లావుద్దీన్‌కోఠి,  ఓ కంపెనీలో పనిచేసే మొత్తం 16మంది వరకు మటన్‌ మండీ తిన్నారు. బుధవారం ఉదయాన్నే వీరు వాంతులు, కడుపునొప్పి, విరేచనాలతో తీవ్ర అస్వస్థతకు గురై సనత్‌నగర్‌లోని ఓ ప్రైవేటు ఆసుపత్రిలో చేరారు. సాయంత్రానికి కోలుకున్న వారిని డిశ్ఛార్జి చేశారు. మరో నలుగురు ఇంకా ఆసుపత్రిలోనే చికిత్స పొందుతున్నారు. ఈ విషయమై గురువారం స్థానికులు.. జీహెచ్‌ఎంసీ అధికారులకు ఫిర్యాదు చేశారు. సమాచారం అందడంతో ఏఎంఓహెచ్‌ డా.భార్గవ నారాయణ, సర్కిల్‌ ఫుడ్‌ ఇన్‌స్పెక్టర్‌ శ్రీవెంక తదితరులు మాషాఅల్లా మండీ హోటల్‌లో తనిఖీలు చేశారు. కొన్నిపదార్థాల నమూనాలను సేకరించారు. ఈ విషయమై ఫుడ్‌ ఇన్‌స్పెక్టర్‌ శ్రీవెంక మాట్లాడుతూ మాషాఅల్లా హోటల్‌ను సీజ్‌ చేశామన్నారు. నమూనాలను పరీక్షల నిమ్తితం పంపుతున్నామని లోపాలేమైనా ఉంటే నిర్వాహకులపై చర్యలుంటాయని చెప్పారు. హోటల్‌ను కార్పొరేటర్‌ కొలను లక్ష్మి, ఇతర నేతలు సందర్శించారు.