కారటగి కనకదాస కూడలిలో బైఠాయించిన ఆందోళనకారులు

కారటగి, న్యూస్‌టుడే: తాలూకాలోని బూదగుంపకు ప్రభుత్వ జూనియర్‌ కళాశాల మంజూరు చేయాలని డిమాండు చేస్తూ బూదగుంప, హాలసముద్ర, తిమ్మాపుర గ్రామాల ప్రజలు సోమవారం కారటగి వరకు పాదయాత్ర నిర్వహించారు. కారటగి చేరుకున్న వారు గంగావతి - రాయచూరు మార్గంలోని కనకదాస కూడలిలో కొంతసేపు బైఠాయించి వాహనాల రాకపోకలను అడ్డుకున్నారు. ఈ సందర్భంగా పలువురు గ్రామ నాయకులు మాట్లాడుతూ గ్రామంలోని ఉన్నత పాఠశాలలో 400 మంది విద్యార్థులు విద్యనభ్యసిస్తున్నారు. ముందుచూపుతో కళాశాల కోసం 2.29 ఎకరాల భూమిని కేటాయించాం. ప్రభుత్వం ఇటీవల మంజూరుచేసిన కళాశాలల్లో బూదగుంప పేరు లేదు. ఈ విషయమై మూడు గ్రామాల ప్రజలకు అన్యాయం జరిగింది. కళాశాల మంజూరు చేయకపోతే జిల్లా పాలనాధికారి కార్యాలయం వరకు పాదయాత్ర చేపడతామన్నారు. గ్రామ పంచాయతీ అధ్యక్షుడు, సభ్యులు, విద్యార్థులు, వివిధ సంఘాలు, పార్టీల నాయకులు పాల్గొన్నారు.