వైకాపాలో రగడ

ఎమ్మిగనూరు గ్రామీణం, న్యూస్‌టుడే: పట్టణంలోని ఓ ప్రైవేట్‌ ఫంక్షన్‌ హాలులో ఆదివారం వైకాపా అభ్యర్థి బుట్టా రేణుక సగర (ఉప్పర) సంఘం నాయకులు ఏర్పాటు చేసిన సమావేశం పాల్గొన్నారు. ఈ కార్యక్రమానికి వీరశైవ సంఘం ఛైర్మన్‌ రుద్రగౌడ్‌, పట్టణ బ్యాంకు ఛైర్మన్‌ యు.కె.రాజు తదితరులు హాజరయ్యారు. పట్టణంలోని ఉప్పర కల్యాణ మంటపాన్ని ఎమ్మెల్యే అనుచరుడికి అప్పగిస్తున్న ఆనవాయితీ కొనసాగుతోందని, అలా కాకుండా సగర సంఘానికి అప్పగించాలని చేసిన తీర్మానాన్ని వైకాపా అభ్యర్థి బుట్టా రేణుక దృష్టికి తీసుకెళ్లారు. ఈ అంశంలో వైకాపా యువ నాయకులు వీరేంద్ర, శ్రీరామ్‌ మధ్య తీవ్ర వాగ్వాదం చోటుచేసుకున్నట్లు తెలిసింది. వీరిద్దరితోపాటు ఉప్పర కల్యాణ మంటపం నిర్వహణ విషయంలో మరికొందరి మధ్య వాగ్వాదం పెట్టుకున్నారు. చివరికి కుల సంఘం పెద్ద సర్దిచెప్పారు. ఉప్పర కల్యాణ మంటపం నిర్వహించే కుల సంఘం నాయకులు దానికి సంబంధించిన లెక్కలు చూపించకపోవడంతో సంఘానికి అప్పగించాలని తీర్మానించినట్లు కుల సంఘం నాయకులు కొందరు పేర్కొన్నారు.