విజయోత్సవ ర్యాలీకి వస్తా

తెదేపా అధినేత చంద్రబాబునాయుడు

 మాట్లాడుతున్న తెదేపా అధినేత నారా చంద్రబాబునాయుడు

నందికొట్కూరు, న్యూస్‌టుడే : సాధారణ ఎన్నికల అనంతరం నందికొట్కూరుకు మళ్లీ వస్తానని, విజయోత్సవ ర్యాలీ చేసుకుందామని తెదేపా అధినేత నారా చంద్రబాబు నాయుడు పేర్కొన్నారు. నందికొట్కూరులో ప్రజాగళం సభ ముగిసిన తర్వాత చంద్రబాబు అల్లూరు గ్రామంలోని నంద్యాల పార్లమెంటు నియోజకవర్గ తెదేపా బాధ్యుడు మాండ్ర శివానందరెడ్డి నివాసం ప్రాంగణంలో తన బస్సులో బస చేశారు. ఈ సందర్భంగా చంద్రబాబు మంగళవారం ఉదయం నాయకులు, కార్యకర్తలతో సమావేశం నిర్వహించి మాట్లాడారు. సైకో జగన్‌ గత ఎన్నికల్లో కోడి కత్తి సానుభూతి పొంది ముఖ్యమంత్రి అయ్యారని, ప్రస్తుతం గులకరాయి నాటకం ఆడుతున్నాడని, ఎన్నికలు సమీపిస్తున్న కొద్ది వివిధ వేశాలతో ప్రజలను మోసం చేసేందుకు వస్తాడని, అలాంటివి నమ్మకుండా తిప్పి కొట్టాలన్నారు. తెదేపాపై చూపుతున్న ఆదరాభిమానాలను చూస్తే నందికొట్కూరును వదలబుద్ధి కావడం లేదన్నారు. కార్యక్రమంలో తెదేపా జిల్లా అధ్యక్షుడు రాజశేఖర్‌, తెదేపా బాధ్యుడు మాండ్ర శివానందరెడ్డి, ఎమ్మెల్యే అభ్యర్థి జయసూర్య,  పురపాలక ఉపాధ్యక్షుడు రబ్బాని, నాయకుడు మాండ్ర లింగారెడ్డి  పాల్గొన్నారు.