గద్వాలకు మిషన్‌ భగీరథ తాగునీరిచ్చాం: ఎమ్మెల్యే

గద్వాల కలెక్టరేట్‌, న్యూస్‌టుడే: గద్వాల పురపాలక సంఘం పరిధిలో అన్ని వార్డుల్లో మిషన్‌ భగీరథ పథకం కింద తాగునీరు అందిస్తున్న ఘనత భారత రాష్ట్ర సమితిదేనని ఎమ్మెల్యే కృష్ణమోహన్‌రెడ్డి పేర్కొన్నారు. మంగళవారం ఆయన పుర పరిధిలోని 20, 21, 31 వార్డుల్లో ప్రచారం నిర్వహించారు. పలు కాలనీల్లో కార్నర్‌ మీటింగ్‌లో మాట్లాడారు. క్షేత్రస్థాయిలో ఆరు గ్యారంటీలు అందడం లేదని వస్తున్న విమర్శలను పక్కదారి పట్టించడానికి ఈ ఎన్నికల్లో మరో ఐదు గ్యారంటీలంటూ కాంగ్రెస్‌పార్టీ నానా తంటాలు పడుతోందని ఆరోపించారు. భారాస అభ్యర్థిగా పోటీ చేస్తున్న ప్రవీణ్‌కుమార్‌ గురుకుల పాఠశాలలను సమర్ధంగా నిర్వహించి వేలాది మంది విద్యార్థులకు బంగారు బాటలు పరిచారని, అలాంటి వ్యక్తిని లోక్‌సభకు పంపించాలని కోరారు. పుర వైస్‌ ఛైర్మన్‌ బాబర్‌, కౌన్సిలర్లు నాగిరెడ్డి, నరహరిశ్రీనివాసులు, మురళి, తదితరులు పాల్గొన్నారు.