నిత్య కల్యాణం.. క్షేత్ర పాలకుడికి ఆరాధన

యాదగిరిగుట్ట అర్బన్‌, న్యూస్‌టుడే: యాదాద్రి మహాదివ్య పుణ్యక్షేత్రంలో మంగళవారం నిత్య కల్యాణోత్సవం, క్షేత్రపాలకుడైన ఆంజనేయస్వామిని కొలుస్తూ ప్రత్యేక పూజలు నిర్వహించారు. వేకువజామున సుప్రభాతంతో మొదలైన కైంకర్యాలు రాత్రి నిర్వహించిన శయనోత్సవంతో ముగిశాయి. వేకువజామున సుప్రభాతం చేపట్టాక మూలవరులకు నిజాభిషేకం, తులసీ పత్రాలతో అర్చన జరిపారు. ప్రధాన ఆలయంలో క్షేత్రపాలకుడైన ఆంజనేయస్వామి మందిరంలో ప్రత్యేక పత్రపూజ చేపట్టారు. మహాముఖ మండపంలో అష్టోత్తరం, నిత్య కల్యాణం జరిపారు. గజ వాహనంపై ఉత్సవమూర్తులను అధిష్ఠింపజేసి మాడ వీధుల్లో ఊరేగించారు. సాయంత్రం అలంకార జోడు సేవోత్సవాన్ని ఆలయ ఆచారంగా నిర్వహించారు. రాత్రి స్వయంభువులను కొలుస్తూ ఆరాధన, సహస్రనామార్చన జరిపారు. విష్ణు పుష్కరిణి వద్ద ఆంజనేయస్వామిని ఆరాధిస్తూ ఆర్జిత పత్రపూజ చేశారు. వివిధ విభాగాల ద్వారా రూ.19,69,278 నిత్యాదాయం సమకూరినట్లు ఈవో భాస్కర్‌రావు తెలిపారు.