సమన్వయంతో పనిచేయండి: ఎస్పీ

నెల్లూరు(నేర విభాగం), న్యూస్‌టుడే: జిల్లాలో పోలీసులు, సెబ్‌ అధికారులు సమన్వయంతో పనిచేసి ఎన్నికల్లో అక్రమ మద్యం, నగదును ఇతర ప్రలోభాలకు అడ్డుకట్ట వేయాలని ఎస్పీ కె.ఆరిఫ్‌ హఫీజ్‌ ఆదేశించారు. సార్వత్రిక ఎన్నికల నేపథ్యంలో జిల్లా పోలీసు కార్యాలయంలోని మినీ కాన్ఫరెన్స్‌ హాలులో గురువారం పోలీసు, సెబ్‌ అధికారులతో  సమన్వయ సమావేశం నిర్వహించారు. తనిఖీలను ముమ్మరం చేసి అక్రమ మద్యం, నాటుసారా, గంజాయి, నిషేధిత మత్తు పదార్థాల విక్రయాలపై ఉక్కుపాదం మోపాలన్నారు. చెక్‌పోస్టులలో ప్రత్యేక నిఘా ఉంచాలని తెలిపారు. ఎన్‌డీపీఎల్‌ మద్యం జిల్లాలోకి అక్రమంగా ప్రవేశించకుండా జాగ్రత్తగా ఉండాలన్నారు. మద్యం స్టాక్‌ పాయింట్లు, బార్‌ అండ్‌ రెస్టారెంట్లను తరచూ తనిఖీ చేసి అవకతవకలను గుర్తించాలని ఆదేశించారు. సమావేశంలో అదనపు ఎస్పీ సీహెచ్‌ సౌజన్య, ఈఎస్‌ కె.బాబు శ్రీధర్‌, సెబ్‌ అధికారులు పాల్గొన్నారు.