దంతవైద్య కళాశాలలో త్వరలో ప్రవేశాలు

ప్రదర్శనను తిలకిస్తున్న మంత్రి మా.సుబ్రమణియన్‌

ఆర్కేనగర్‌, న్యూస్‌టుడే: పుదుకోట్టైలో నిర్మాణంలో ఉన్న కొత్త దంతవైద్య కళాశాలలో వచ్చే విద్యాసంవత్సరం నుంచి ప్రవేశాలు జరగనున్నాయని ఆరోగ్య శాఖ మంత్రి మా.సుబ్రమణియన్‌ తెలిపారు. చెన్నై ప్యారీస్‌లోని దంతవైద్య కళాశాల ఆస్పత్రిలో దంతవైద్య ప్రదర్శన, రక్తదాన శిబిరాన్ని మంత్రి ప్రారంభించారు. ఈ సందర్భంగా ఆయన మాట్లాడుతూ....రాష్ట్రంలో దంతవైద్య కళాశాలలో, చిదంబరం అన్నామలై దంత వైద్య కళాశాలలో 100 మంది విద్యార్థులు చేరారని చెప్పారు. వచ్చే ఏడాది మూడో దంతవైద్య కళాశాల పుదుకోట్టైలో ఏర్పడనుందన్నారు. నిర్మాణ పనులు 80 శాతం పూర్తి అయ్యాయని చెప్పారు. వచ్చే ఏడాదిలో 50 మంది విద్యార్థులు చేరేలా పనులు జరుగుతున్నాయని తెలిపారు. మదురై ఎయిమ్స్‌ నిర్మాణ పనులు త్వరగా పూర్తిచేసేందుకు, రాష్ట్రంలో ఆరు వైద్య కళాశాలలు ప్రారంభించేందుకు  అనుమతి ఇవ్వాలని కేంద్ర ఆరోగ్యశాఖ మంత్రిని కలిసి కోరామన్నారు. రాష్ట్రంలోని ప్రభుత్వ పాఠశాల విద్యార్థులకు సంచార దంతవైద్య వాహనం ద్వారా పరీక్షలు నిర్వహిస్తామన్నారు. రాష్ట్రంలో 4,308 వైద్యుల ఖాళీలను భర్తీ చేస్తామని తెలిపారు. వచ్చే ఏడాది తిరుచ్చిలో కొత్తగా నర్సింగ్‌ కళాశాల ప్రారంభిస్తామని వెల్లడించారు.