బెదిరింపు రాజకీయాలకు భయపడం

తమిళిసై

సైదాపేట, న్యూస్‌టుడే: బెదిరింపు రాకీయాలకు భయపడబోమని మాజీ గవర్నర్‌ తమిళిసై తెలిపారు. లోక్‌సభ ఎన్నికల సమయంలో ఆళ్వార్‌పేటలోని పోలింగ్‌బూత్‌లో ఏజెంట్‌గా ఉన్న భాజపా నిర్వాహకుడు గౌతమన్‌పై డీఎంకే వారు దాడి చేశారని తమిళిసై ఆరోపించారు. ఈ నేపథ్యంలో ఆళ్వార్‌పేటలోని గౌతమన్‌ ఇంటికి వెళ్లిన తాగునీటి బోర్డు అధికారులు అతని ఇంట్లో భూమి లోపల ట్యాంక్‌ (సంపు)ను పరిశీలించినట్లు తెలుస్తోంది. ఈ ఘటన అనంతరం గౌతమన్‌ ఇంటికి వెళ్లిన తమిళిసై జరిగిన విషయాలు అడిగి తెలుసుకున్నారు. ఈ సందర్భంగా ఆమె విలేకర్లతో మాట్లాడుతూ... తమిళనాడు ప్రభుత్వ అధికారులతో బెదిరించడం సబబుకాదన్నారు. గౌతమన్‌ గిరిజనుడని, అయితే అతను భాజపాకు చెందినవాడు కావడంతో అగ్ర కులానికి చెందినవాడని డీఎంకే కుల రాజకీయాలకు పాల్పడుతుందన్నారు. గౌతమన్‌ ఇంట్లో సంపు సౌకర్యం మాత్రమే ఉందన్నారు. అయితే తాగునీటి బోర్డు అధికారులు ఆ సంపు కనెక్షన్‌ సైతం తొలగించేందుకు వెళ్లడం దారుణమన్నారు. అధికారం చేతిలో ఉంటే ఏమైనా చేస్తారా? అని ప్రశ్నించారు. డీఎంకేకు ఓటమి భయం పట్టుకుందని, ఇలాంటి బెదిరింపు రాజకీయాలకు భయపడబోమని తెలిపారు.