అయిదుశాతం రాయితీకి చివరి అవకాశం

అజారా ఆసుపత్రి యాజమాన్యం నుంచి చెక్కు తీసుకుంటున్న బల్దియా అధికారులు
కార్పొరేషన్‌, న్యూస్‌టుడే: ముందస్తు ఆస్తిపన్ను చెల్లింపులకు వరంగల్‌ నగర ప్రజల నుంచి స్పందన లభించింది. సోమవారం సాయంత్రం వరకు సుమారు రూ.18 కోట్ల పైన వసూలైనట్లు బల్దియా పన్నుల విభాగం అధికారులు తెలిపారు. 2024-25 ఆర్థిక సంవత్సరానికి సంబంధించిన ఆస్తిపన్ను ముందస్తుగా చెల్లిస్తే అయిదుశాతం రాయితీ ఉంటుంది. మంగళవారం సాయంత్రంలోపు గడువు ముగియనుందని, నగర ప్రజలు సద్వినియోగం చేసుకోవాలని గ్రేటర్‌ వరంగల్‌ కమిషనర్‌ అశ్విని తానాజీ వాకడే పిలుపునిచ్చారు. సోమవారం వరంగల్‌ ములుగురోడ్డు అజారా ఆసుపత్రి యాజమాన్యం రూ.16,22,142, భీమారానికి చెందిన ఎస్వీఎస్‌ కళాశాల రూ.14,11,522  ఆస్తిపన్ను చెల్లించారు. ఇందుకు సంబంధించిన చెక్కులను కాజీపేట సర్కిల్‌ ఉప కమిషనర్‌ రవీందర్‌, ఆర్వో యూసుఫొద్దీన్‌, ఆర్‌ఐ సురేష్‌ తీసుకున్నారు. ముందస్తు ఆస్తిపన్ను రూ.25 కోట్లు వసూలు చేయాలని కమిషనర్‌ లక్ష్యం ఖరారు చేయగా.. సోమవారం రాత్రి వరకు రూ.18 కోట్లు దాటింది. మంగళవారం చివరి రోజూ రూ.3-4 కోట్లు వసూలవుతుందని అధికారుల అంచనా.