రూ.56 కోట్లతో 13 వేల ఎకరాలకు సాగునీరు

వేముల, న్యూస్‌టుడే: వేముల, వేంపల్లె మండలాలకు మహర్దశ రానుంది. రెండు మండలాల్లోని 13,520 ఎకరాలకు సాగునీటిని అందించేందుకు ప్రభుత్వం రూ.56.83 కోట్లు కేటాయించింది. ఇందుకు సంబంధించిన పనులకు ఎంపీ వైఎస్‌ అవినాష్‌రెడ్డి గురువారం భూమిపూజ చేయనున్నారు. వేముల మండలంలోని పెండ్లూరు, వేంపల్లె మండలంలోని అలవలపాడు, నాగూరు చెరువులకు అలవలపాడు సమీపంలోని గాలేరు నగరి కాలువ ద్వారా నీటిని సరఫరా చేసి అక్కడి నుంచి 1,571 ఎకరాలకు సాగునీరందించనున్నారు. దీంతోపాటు పీబీసీ నుంచి వేముల, వేంపల్లె మండలాల్లోని 11,950 ఎకరాలకు సాగునీరందించనున్నారు. వరదల సమయంలో చెరువులకు నీటిని నింపి పంటలకు సరఫరా చేయనున్నట్లు సంబంధిత అధికారి ఒకరు ‘న్యూస్‌టుడే’కి తెలిపారు.