కేంద్ర ఎన్నికల సంఘం వెల్లడి

దిల్లీ: లోక్‌సభ ఎన్నికల్లో భాగంగా మూడో దశలో పోలింగ్‌ జరగనున్న 95 స్థానాల్లో 1,351 మంది పోటీపడుతున్నట్లు కేంద్ర ఎన్నికల సంఘం మంగళవారం ఓ ప్రకటనలో తెలిపింది. 12 రాష్ట్రాలు, కేంద్ర పాలిత ప్రాంతాల పరిధిలోని ఈ 95 స్థానాల్లో మే ఏడో తేదీన పోలింగ్‌ జరగనుంది. 1,351 మందిలో మధ్యప్రదేశ్‌లోని బైతూల్‌ స్థానం నుంచి అదృష్టాన్ని పరీక్షించుకుంటున్న ఎనిమిది మంది అభ్యర్థులూ ఉన్నారు. వాస్తవానికి ఈ స్థానానికి రెండో దశలోనే పోలింగ్‌ జరగాల్సి ఉంది. అయితే బీఎస్పీ అభ్యర్థి మరణంతో కేంద్ర ఎన్నికల సంఘం ఆ స్థానంలో పోలింగ్‌ను మూడో దశకు మార్చింది. మూడో దశకు సంబంధించి 95 స్థానాలకు మొత్తం 2,963 నామినేషన్‌లు వచ్చాయని, వాటిలో 1,563 నామినేషన్లను ఆమోదించినట్లు ఈసీ తెలిపింది. ఈ నెల 22వ తేదీతోనే నామినేషన్ల ఉప సంహరణకు గడువు ముగిసినట్లు వెల్లడించింది.