హైదరాబాద్‌: నాగర్‌కర్నూలు జిల్లాలోని అచ్చంపేటలో తమ పార్టీ నేతలపై కాంగ్రెస్ నాయకులు దాడులు చేశారని.. దీన్ని ఖండిస్తున్నట్లు భారాస కార్యనిర్వాహక అధ్యక్షుడు కేటీఆర్ తెలిపారు. నాగర్‌కర్నూలు భారాస ఎంపీ అభ్యర్థి ఆర్ఎస్ ప్రవీణ్ కుమార్ ఎక్స్(ట్విటర్‌) వేదికగా చేసిన పోస్టుపై ఆయన స్పందించారు. మీరు చెప్పే ప్రేమను పంచడం అంటే ఇదేనా రాహుల్‌ జీ అని కాంగ్రెస్‌ అగ్రనేతను ప్రశ్నించారు. స్థానిక కాంగ్రెస్‌ నేతలు అధికార దుర్వినియోగం చేస్తూ ప్రత్యర్థులపై దాడులకు పాల్పడుతున్నారని ఆరోపించారు. ఈ దాడులు, దుర్భాషల్లో పోలీసులు కూడా భాగస్వామ్యం కావడం సిగ్గుచేటన్నారు. దాడులకు పాల్పడిన గూండాలు, ప్రేక్షకపాత్ర పోషించిన పోలీసులపై డీజీపీ చర్యలు తీసుకోవాలని.. లేకుంటే మానవ హక్కుల కమిషన్‌ను ఆశ్రయిస్తామని కేటీఆర్‌ తెలిపారు.