హైదరాబాద్‌, న్యూస్‌టుడే: దేశ ప్రథమ ప్రధానమంత్రి జవహర్‌లాల్‌ నెహ్రూ ఉదాసీనత వల్లే చైనా దురాక్రమణ జరిగిందని కేంద్ర మంత్రి జైశంకర్‌ చేసిన వ్యాఖ్యలను తీవ్రంగా ఖండిస్తున్నామని పీసీసీ సీనియర్‌ ఉపాధ్యక్షుడు జి.నిరంజన్‌ తెలిపారు. జైశంకర్‌ తక్షణం బహిరంగ క్షమాపణలు చెప్పాలని డిమాండ్‌ చేశారు. నిరంజన్‌ బుధవారం గాంధీభవన్‌లో విలేకరుల సమావేశంలో మాట్లాడారు. నెహ్రూను ప్రపంచం దార్శనికుడు, శాంతిదూత, నవభారత నిర్మాతగా గుర్తించిందన్నారు. చైనాతో స్నేహబంధం బలపర్చడానికి పంచశీల ఒప్పందాన్ని కుదుర్చుకున్న విషయాన్ని మరవకూడదన్నారు. భాజపా నేతలు ఎన్నికల సమయంలో కాంగ్రెస్‌ నాయకులపై బురదజల్లే ప్రయత్నం చేస్తున్నారన్నారు. ప్రధాని మోదీ పదేపదే ఎన్నికల కోడ్‌ ఉల్లంఘిస్తున్నా సీఈసీ చర్యలు తీసుకోవడం లేదని , దీనిపై బుధవారం మరోసారి సీఈసీకి లేఖ ద్వారా ఫిర్యాదు చేశామని చెప్పారు.