హైకోర్టుకు నివేదించిన ఎన్నికల సంఘం

ఈనాడు, హైదరాబాద్‌: భారాస ఎమ్మెల్యే కె.టి.రామారావు ప్రతిష్ఠను దెబ్బతీసేలా వ్యాఖ్యలు చేసి ఎన్నికల నియమావళిని ఉల్లంఘించారంటూ మంత్రి కొండా సురేఖపై భారాస అధికార ప్రతినిధి దాసోజు శ్రవణ్‌కుమార్‌ ఇచ్చిన ఫిర్యాదుపై ఈనెల 26లోగా తగిన ఉత్తర్వులు వెలువరిస్తామని కేంద్ర ఎన్నికల సంఘం హైకోర్టుకు నివేదించింది. వరంగల్‌లో కొండా సురేఖ..  కేటీఆర్‌పై చేసిన అనుచిత వ్యాఖ్యలపై తాము ఫిర్యాదు ఇచ్చినా ఎన్నికల సంఘం చర్య తీసుకోలేదని సవాలు చేస్తూ దాసోజు సోమవారం హైకోర్టులో పిటిషన్‌ దాఖలు చేశారు. దీనిపై ప్రధాన న్యాయమూర్తి జస్టిస్‌ ఆలోక్‌ అరాధే, జస్టిస్‌ జె.అనిల్‌కుమార్‌లతో కూడిన ధర్మాసనం బుధవారం విచారణ చేపట్టింది. పిటిషనర్‌ తరఫు సీనియర్‌ న్యాయవాది బి.మయూర్‌రెడ్డి వాదనలు వినిపించారు. సురేఖపై తగిన చర్యలు తీసుకునేలా ఆదేశాలు జారీ చేయాలని కోరారు. కేంద్ర ఎన్నికల సంఘం తరఫు న్యాయవాది వాదనలు వినిపిస్తూ ఫిర్యాదును పరిశీలించి ఈనెల 26లోగా తగిన ఉత్తర్వులు వెలువరిస్తామని తెలిపారు. వాదనలను విన్న ధర్మాసనం.. ఫిర్యాదుపై తగిన చర్యలు తీసుకుంటామని ఎన్నికల సంఘం చెబుతున్న దృష్ట్యా ఎలాంటి ఉత్తర్వులు అవసరంలేదని పేర్కొంటూ పిటిషన్‌పై విచారణను మూసివేసింది.