హైకోర్టులో ఎమ్మెల్యే వివేకానంద పిటిషన్‌
నేడు విచారణ

ఈనాడు, హైదరాబాద్‌: తమ పార్టీ తరఫున గెలిచి కాంగ్రెస్‌లో చేరిన స్టేషన్‌ఘన్‌పూర్‌ ఎమ్మెల్యే కడియం శ్రీహరి, భద్రాచలం ఎమ్మెల్యే తెల్లం వెంకట్రావులపై అనర్హత వేటు వేయాలన్న పిటిషన్‌లను స్పీకర్‌ స్వీకరించడం లేదని పేర్కొంటూ కుత్బుల్లాపూర్‌ భారాస శాసనసభ్యుడు వివేకానంద హైకోర్టులో పిటిషన్‌ దాఖలు చేశారు. ఈనెల 3న, 9న స్పీకర్‌ను కలిసి అనర్హత పిటిషన్‌ సమర్పించడానికి వెళ్లగా కనీసం కలవడానికి అనుమతించలేదన్నారు. ‘‘ఈనెల 10న రిజిస్టర్‌ పోస్టు, మెయిల్‌ ద్వారా పంపినా అందినట్లు ధ్రువీకరించడానికి స్పీకర్‌ కార్యాలయం నిరాకరించింది. వెంకట్రావు ఈ నెల 6న తుక్కుగూడలో ఏర్పాటు చేసిన రాహుల్‌గాంధీ బహిరంగ సభలో కాంగ్రెస్‌లో చేరారు. మార్చి 31న కడియం శ్రీహరి కాంగ్రెస్‌ కండువా ధరించారు. ఆయన కుమార్తె కావ్యను ఆ పార్టీ వరంగల్‌ ఎంపీ అభ్యర్థిగా ప్రకటించింది. స్పీకర్‌ దురుద్దేశంతో అనర్హత పిటిషన్‌లను స్వీకరించడానికి నిరాకరిస్తున్నారు. పార్టీ ఫిరాయించిన వారికి నోటీసులు జారీ చేసేలా స్పీకర్‌ను ఆదేశించండి’’ అని ఎమ్మెల్యే వివేకానంద న్యాయస్థానానికి విజ్ఞప్తి చేశారు. ఈ పిటిషన్‌పై జస్టిస్‌ బి.విజయ్‌సేన్‌రెడ్డి గురువారం విచారణ చేపట్టనున్నారు.