హైదరాబాద్‌, న్యూస్‌టుడే: వరంగల్‌ మేయర్‌ (భారాస), మాజీ ఎంపీ గుండు సుధారాణి, ఆప్కో మాజీ ఛైర్మన్‌, జనగామ జిల్లా భారాస నేత మండల శ్రీరాములు, నల్గొండ డీసీసీబీ డైరెక్టర్‌ అందెల లింగంయాదవ్‌, ఓయూ జేఏసీ నేత కోటూరి మానవతారాయ్‌లు కాంగ్రెస్‌ పార్టీలో చేరారు. గురువారం గాంధీభవన్‌లో కాంగ్రెస్‌ చేరికల కమిటీ సభ్యులు జగ్గారెడ్డి, కోదండరెడ్డిలు వీరికి కండువాలు కప్పి పార్టీలోకి ఆహ్వానించారు. ‘కాంగ్రెస్‌ సిద్ధాంతాలు, భావజాలం పట్ల ఆకర్షితులమై పార్టీలో చేరుతున్నాం’ అని ఈ సందర్భంగా వారి నుంచి డిక్లరేషన్‌ పత్రాలు తీసుకున్నారు. గుండు సుధారాణి గతంలో పీసీసీ అధ్యక్షుడు, ముఖ్యమంత్రి రేవంత్‌రెడ్డిని మర్యాదపూర్వకంగా కలిసిన విషయం తెలిసిందే.

మోదీ మళ్లీ ప్రధాని అయితే రిజర్వేషన్లు ఎత్తేస్తారు: జగ్గారెడ్డి

నరేంద్రమోదీ మళ్లీ ప్రధానమంత్రి అయితే రాజ్యాంగాన్ని రద్దు చేసి రిజర్వేషన్లు ఎత్తేస్తారని పీసీసీ కార్యనిర్వాహక అధ్యక్షుడు జగ్గారెడ్డి ఆరోపించారు. రాహుల్‌గాంధీ ప్రధాని అయితే దేశవ్యాప్తంగా కుల గణన చేసి రిజర్వేషన్లు పెంచుతారని పేర్కొన్నారు.