ఈనాడు, వరంగల్‌: మాజీ మంత్రి, సినీనటుడు బాబూమోహన్‌ వరంగల్‌ లోక్‌సభ స్థానం నుంచి స్వతంత్ర అభ్యర్థిగా గురువారం నామినేషన్‌ దాఖలు చేశారు. మధ్యాహ్నం వరంగల్‌ రిటర్నింగ్‌ అధికారి కార్యాలయానికి చేరుకున్న ఆయన నడుము నొప్పితో ఇబ్బంది పడగా.. సిబ్బంది వీల్‌ఛైర్‌ ఏర్పాటు చేసి లోనికి పంపారు. రిటర్నింగ్‌ అధికారి ప్రావీణ్యకు నామినేషన్‌ పత్రాలు అందజేశారు. అనంతరం మీడియాతో మాట్లాడారు. కేఏ పాల్‌ ప్రజాశాంతి పార్టీ నుంచి నామినేషన్‌ వేస్తారనే ప్రచారం జరిగిందని విలేకరుల ప్రశ్నకు బదులిస్తూ.. కేఏ పాల్‌ కాఫీకి రమ్మంటే వెళ్లానని, అక్కడ పాల్‌ తనకు కండువా కప్పి పార్టీ అధ్యక్షుడి పదవి ఇచ్చారని చెప్పారు. తాను ఎలాంటి పార్టీ సభ్యత్వం తీసుకోలేదని, అదే రోజు ఆ పార్టీకి టాటా చెప్పానని తెలిపారు. వరంగల్‌లో కొందరు అభిమానుల కోరిక మేరకు స్వతంత్ర అభ్యర్థిగా నామినేషన్‌ వేశానని స్పష్టం చేశారు.