ఈనాడు, హైదరాబాద్‌: ఖమ్మం, కరీంనగర్‌ పార్లమెంటు స్థానాల కాంగ్రెస్‌ అభ్యర్థులు రఘురాంరెడ్డి, వెలిచాల రాజేందర్‌రావు, వరంగల్‌-ఖమ్మం-నల్గొండ ఎమ్మెల్సీ స్థానం అభ్యర్థిగా పార్టీ ప్రకటించిన తీన్మార్‌ మల్లన్న గురువారం జూబ్లీహిల్స్‌లోని నివాసంలో సీఎం రేవంత్‌రెడ్డిని కలిశారు. సమయం తక్కువగా ఉన్నందున విస్తృతంగా ప్రచారం చేసి విజయం సాధించాలని సీఎం వారికి సూచించారు. ప్రధానంగా రాష్ట్ర ప్రభుత్వం అమలుచేస్తున్న గ్యారంటీ హామీలను, పార్టీ జాతీయ మ్యానిఫెస్టోను వివరించాలని మార్గదర్శనం చేశారు. రఘురాంరెడ్డి వెంట మంత్రి పొంగులేటి శ్రీనివాస్‌రెడ్డి, మాజీ ఎంపీ సురేందర్‌రెడ్డి, పొంగులేటి సోదరుడు ప్రసాద్‌రెడ్డి తదితరులు ఉన్నారు. ఈ సందర్భంగా వెలిచాల రాజేందర్‌రావుకు సీఎం బీఫాం అందజేశారు.