మిగిలిన 16 స్థానాల్లో కాంగ్రెస్‌కు మద్దతు
రాష్ట్ర కార్యదర్శివర్గ సమావేశంలో నిర్ణయం

ఈనాడు, హైదరాబాద్‌: భువనగిరి లోక్‌సభ స్థానంలో పోటీలో కొనసాగాలని సీపీఎం నిర్ణయించింది. రాష్ట్రంలోని మిగిలిన 16 స్థానాల్లో కాంగ్రెస్‌ అభ్యర్థులకు మద్దతు ఇవ్వనుంది. ఈ మేరకు ఆదివారం నిర్ణయం తీసుకుంది. సీపీఎం నేతలతో సీఎం రేవంత్‌రెడ్డి శనివారం జరిపిన చర్చల్లో భువనగిరిలోనూ కాంగ్రెస్‌కే మద్దతివ్వాలని కోరిన విషయం తెలిసిందే. ఈ ప్రతిపాదనను సీపీఎం రాష్ట్ర నేతలు జాతీయ నాయకత్వం దృష్టికి ఆదివారం ఉదయం తీసుకెళ్లారు. ఆ తర్వాత ముఖ్యనాయకులు చర్చించుకున్నారు. పార్టీ రాష్ట్ర కార్యదర్శివర్గ సమావేశం టి.జ్యోతి అధ్యక్షతన ఆదివారం సాయంత్రం హైదరాబాద్‌లోని ఎంబీ భవన్‌లో జరిగింది. పొలిట్‌బ్యూరో సభ్యుడు బీవీ రాఘవులు, రాష్ట్ర కార్యదర్శి తమ్మినేని వీరభద్రంతో పాటు 15 మంది కార్యదర్శివర్గ సభ్యులు హాజరయ్యారు. భువనగిరిలో ప్రచారంలో ఉన్న నాయకులు ఆన్‌లైన్‌లో పాల్గొన్నారు. సీపీఎం విధానాన్ని ప్రజల్లోకి తీసుకెళ్లాలంటే ఒక్క నియోజకవర్గంలో అయినా పోటీలో ఉండాల్సిందేనని పార్టీ అభిప్రాయపడ్డట్లు సమాచారం. భువనగిరి స్థానానికి సీపీఎం తరఫున మహమ్మద్‌ జహంగీర్‌ నామినేషన్‌ వేసిన విషయం తెలిసిందే.

భాజపా అన్యాయాల్ని ఎండగడతాం

-తమ్మినేని

భువనగిరిలో సీపీఎం అభ్యర్థి మహమ్మద్‌ జహంగీర్‌ను బలపర్చాలని పార్టీ రాష్ట్ర కార్యదర్శి తమ్మినేని వీరభద్రం ప్రజలకు విజ్ఞప్తి చేశారు. రాష్ట్రంలో మిగిలిన 16 స్థానాల్లో మతోన్మాద భాజపాను ఓడించేందుకు ఇండియా కూటమిలో భాగస్వామిగా ఉన్న కాంగ్రెస్‌ అభ్యర్థులకు మద్దతు ఇవ్వాలని కోరారు. పార్టీ కార్యదర్శివర్గ సమావేశం అనంతరం ఆయన ఈ మేరకు ప్రకటన విడుదల చేశారు. దేశానికి, తెలంగాణ ప్రజలకు భాజపా చేసిన అన్యాయాలను ఎండగట్టేందుకు చేస్తున్న పోరాటాన్ని సీపీఎం మరింత ఉద్ధృతం చేస్తుందని ఆయన పేర్కొన్నారు.