ఈనాడు, హైదరాబాద్‌: బేగంబజార్‌ పోలీసు స్టేషన్‌లో తనపై నమోదైన కేసును కొట్టివేయాలని కోరుతూ భాజపా హైదరాబాద్‌ ఎంపీ అభ్యర్థి కె.మాధవీలత సోమవారం హైకోర్టులో పిటిషన్‌ దాఖలు చేశారు. ఒక వర్గానికి వ్యతిరేకంగా వ్యాఖ్యలు చేశానని, విల్లును ఎక్కుపెట్టానంటూ ఏప్రిల్‌ 20న నమోదైన కేసును కొట్టివేయాలని కోరారు. ఏప్రిల్‌ 17న శ్రీరామనవమి సందర్భంగా భక్తులు నిర్వహించిన యాత్రలో పాల్గొని  శ్రీరాముడి వలె విల్లు పట్టుకుని పోజు ఇచ్చానని.. అది నేరం కాదని తెలిపారు. తనకు ఎవరినీ కించపరిచే ఉద్దేశం లేదని, ఎలాంటి నినాదాలు, ప్రసంగాలు చేయలేదన్నారు. తనపై పెట్టిన కేసును కొట్టివేయాలని, పిటిషన్‌పై విచారణ ముగిసేదాకా దర్యాప్తు ప్రక్రియను నిలిపివేస్తూ మధ్యంతర ఉత్తర్వులివ్వాలని కోరారు. దీనిపై హైకోర్టు మంగళవారం విచారణ చేపట్టే అవకాశం ఉంది.